玉架山考古博物馆

玉架山考古博物馆勒垃个玉架山遗址

玉架山考古博物馆勒垃中华人民共和国浙江省杭州市临平区东湖街道星河路兴中路路口，是浙江头一座考古学科专题博物馆，博物馆占地约27亩，总建筑面积约2.5万平方米，馆藏文物有得1800多件，主要从玉架山遗址、茅山遗址、临平遗址群来个。玉架山考古博物馆是玉架山考古遗址公园个二期项目。

建设

建设背景

玉架山遗址2008年畀人发现，有得6隻2009年发现个环壕聚落遗址，勒垃良渚考古力学头一趟发现。玉架山遗址辰光范围包括良渚文化早、中、晚期，发掘出397座墓葬、21座灰坑，10隻建筑遗迹，拢总出土4000多件陶器、石器、玉器咾啥个文物，是良渚文化遗址当中单体出土墓葬数量顶多个遗址。遗址2011年成为当年个全国十大考古新发现，2017年成为第七批浙江省文物保护单位。

茅山遗址勒垃2009到2011年经历三期发掘，发现伊历经马家浜文化、崧泽文化、良渚文化、广富林文化四段文化，出土良渚时期个独木舟，外加头一趟发现良渚时期个稻田搭仔牛脚蹄印子。2015年9月份，茅山遗址成为杭州市级文物保护点。

临平遗址群勒垃皋亭山、超山、临平山伊圈，已经发现个遗址已经有得廿多隻，是环太湖地区良渚文化个高等级区域中心。

建设设计

2022年11月份，玉架山考古遗址公园造好。2023年初，玉架山考古博物馆开工，用个是REMPC（科研+设计+制造+采购+施工）建造模式，2024年底完成五方主体个单体验收，开展展陈施工。2025年5月18号，玉架山博物馆开馆。

玉架山考古博物馆个核心理念是“以玉为媒，间架为山”，拿自然帮人文景观融合起来，用仔弗少纯白色个石料幕墙，勾勒出山个样子，呼应玉架山遗址自然风貌。博物馆设计南高北低，呼应玉架山山形。博物馆里向个空间原型是“间架”，从东往西拿建筑拆分成几隻展览空间。

展厅

博物馆陈列基本用“3+1”格局进行展出，有得三大展厅搭仔1隻临时展厅。

常设展厅

博物馆个三大展厅分别是临平遗址群厅、茅山遗址厅、玉架山遗址厅，还头一趟设置无障碍展厅（“心光”）。玉架山遗址厅展出玉器、石器、陶器咾啥个，设置大型落地玻璃，好看清爽整隻玉架山考古遗址公园。利用虚拟现实技术，勒垃博物馆里向复原遗址个地形、地貌、遗存。茅山遗址厅有整体提取个稻田，圣水牛勒垃广富林时期个农耕层留下来个脚蹄印子也是展品，还设置有碳化稻米组成个“茅山”字样光影装置。临平遗址群厅展出从临平区交交关关古聚落、古坟里向掘出个文物，有玉琮、神人兽面、小玉龙咾啥个，还复原展示古墓葬。

临时展厅

博物馆个临时展厅搞临时展览。开业个辰光，伊展出“星斗——古国时代的中国”，还同杭州博物馆一道开展“博物馆之城——杭州的博物馆事业高质量发展成果展”。

对外交流

2025年5月17号，苏州考古博物馆联合上海崧泽遗址博物馆、杭州玉架山考古博物馆、马鞍山凌家滩遗址博物馆启动长三角考古遗址博物馆研学活动。。另外，“5·18国际博物馆日”杭州主会场活动也勒垃箇𡍲举办。