湖郡女子中学
（从湖郡女塾转戳到箇里）
| 湖郡女校 | |
|---|---|
 | |
| 湖州市文物保护单位 | |
| 所在 | 飞英街道人民路 |
| 分类 | 近代优秀建筑 |
| 时代 | 清-民国 |
| 编号 | 不详 |
| 登录 | 1998年3月份 |
|
| |
湖郡女子中学（Virginia School）是老底子美南监理会差会勒垃湖州开个爿女子学堂，勒垃现在个人民路东面，湖州市第一人民医院里向，湖州市文物保护单位。
历史
[编辑]湖郡女中个历史好寻着清光绪四年（1878）勒垃江苏省嘉定县南翔镇创办个悦来书塾，後首来分成男塾华英学堂、女塾文洁女塾，女塾个名字从英文单词“virginia”来个。1901年，学堂搬到湖州，1905年勒垃海岛堂附近（乃朝湖州市第一医院、湖州市第十二中学）造仔新校舍，女塾勒垃伊西面，中文校名改成湖郡女塾，英文名字呒没变。学堂原先只有小学部，1907年增加蒙养园搭仔中学部，1927年改名湖郡女子中学[1][2]。湖郡女中同伊个姊妹学堂上海中西女中、苏州景海女校是监理会勒垃中国开个三大女校。
1952年12月份，湖郡女中同东吴大学吴兴附属中学合并，成立湖州初级中学，发展成现在个湖州市第二中学（高中部，1998年搬去学士路哉）搭仔湖州市第十二中学（初中部，勒垃原先个地方开学堂），原湖郡女中校址1956年划畀浙江省湖州师范学校（乃朝湖州师范学院），1997年学堂搬脱，转让畀湖州市第一人民医院。
现状
[编辑]
湖郡女校西楼（左）搭仔东楼（右）
原湖郡女中教学楼勒垃现在人民路东面个湖州市第一人民医院里向，有得两幢两层楼个西式建筑，外墙红褐相间个，屋顶是美国坡顶乡村别墅风格，西楼南面个门楣丄刻有1905箇几个字，乃朝是医院个医技楼（3号楼），是湖州市区挺下来少有个大型西式建筑[3]。