湖州市东风小学教育集团

湖州市东风小学教育集团，是吴越湖州市个一隻公办小学教育集团，是2018年个辰光成立个。介歇有南华路搭建设路两隻校区。

历史沿革

湖州市东风小学本来有东风搭南园两个校区：东风校区有拉月湖桥西老底子关帝庙个地方，1909年3月份陆树藩拉许丄创办湖州东区公立典业初等小学堂，后末来改成关帝庙小学、贵泾初级小学、第五保国民学校、贵泾完全小学、向前小学、东风战校，1972年改名东风小学，1978年7月份韶山小学併進东风小学。南园校区有拉月湖桥东老底子归安县学个地方，民国手里建立县立第六小学，1945年改成县立孔庙小学，1948年到1953年是浙江省湖州师范附属小学（湖师附小），1953年改成红墙灣小学，1967年改名少年路小学，1978年7月份朝晖小学併進少年路小学，1983年改名南园小学，2002年并进东风小学。

2018年7月份，南华路校区启用（有拉原來湖州市第十一中学碧浪校区），湖州市东风小学改名成湖州市东风小学教育集团。后末来东风校区搭南园校区弗再增收学生子，原来个学生子转到建设路校区，东风校区改建成湖州市东风幼儿园，南园校区改建成吴兴区教师进修学校、吴兴区老年大学。