浙江省湖州中学

浙江省湖州中学
Huzhou High School, Zhejiang
浙江省湖州中学; Huzhou High School, Zhejiang
	湖州中学弁山校区正门
	自强不息，厚德载物
校長	俞根强

浙江省湖州中学勒垃浙江省湖州市，简称湖州中学^[1]或者湖中^[2]，是浙江省湖州市个公办全日制普通高中，校本部老底子勒垃莲花庄，现在勒垃弁山校区，也就是湖州同心路1555号。

历史

1902年，湖州府知府锡守纶筹办创办浙江省湖州中学个前身“湖州府中学堂”，勒垃原先湖州爱山书院个校址、校舍。

1905年，科举制度废脱，进行五年学制个中学教育，增设史地、算学、英文等课程。

1906年，同盟会会员沈谱琴先生做湖州府中学堂监督，勒垃爱山书院老地方增设师范传习所（後来叫“师范学校”）。

1909年，湖州府中学堂改名“浙江省立第三中学堂”。

1911年11月6号夜里向，沈谱琴、陈振甫咾啥个领仔学生仔起义，攻占府衙门，光复湖州。

1912年3月份，“浙江省立第三中学堂”改叫“浙江省立第三中学校”。学堂搬去天宁巷个天宁寺。原先爱山书院箇地方，老校长沈谱琴又续办到1916年止，改名县立吴兴中学校。

1917年，原爱山书院个师范学校扩充到“浙江省立第三师范学校”，增开黄沙路乌程县学旧址校址。

1922年11月份，全国实行新学制，中学拆成初中搭仔高中，进行“三、三制”，明令“中师两校合并”。

1923年7月份，“省立第三师范学校”并进省立三中，叫“浙江省立第三中学校”，分设中学、师范两部，增加小学部，中学部勒垃天宁巷三中箇地方，师范部、附小勒垃黄沙路。

1927年10月份，改叫“浙江省立第三中学”。

1933年8月份，省立三中改叫“浙江省立湖州初级中学”。

1935年秋，学堂增加高中部。

1936年8月份，学堂改名“浙江省立湖州中学”。

1937年，日本发动全面侵华战争，11月份湖州沦陷，校长周翔领仔部分师生流亡浙东。

1938年8月份，湖州中学帮杭高、杭女、嘉中、杭师、民实、杭初七隻学堂勒垃丽水碧湖镇合并成立“浙江省临时联合中学”；必过因为忒远哉，交关师生还留勒浙西，有望浙西天目山跑个。

1938年10月份，浙江省第一行政督察专员公署勒垃西天目山禅源寺创办“浙江省第一区各县联立战时初中学生补习学校”，原省立湖州中学师范部主任方秉性做校务主任。

1939年2月份，省政府接管补习学校，改办“浙江省立浙西临时中学”，有得初高中，弗少是原先省立湖州中学个人。

1939年5月份，浙西临中畀省里向拆分成第一、二、三临中，一中（即本部）设勒天目山禅源寺，二中设勒孝丰县统里村，三中设勒昌化县。

1941年，学校增设简易师范科，4月份禅源寺畀东洋人个飞机轰炸脱，部分学生仔转到浙西二中里向学习，部分学生帮学堂一道搬去青山殿。

1942年，浙西二中增设高中部。

1943年7月份，日寇拿浙西二中勒垃个统里村屠杀光，学堂迁去西天目山丄。

1945年初，学校又从西天目山搬去麻车埠，7月份学堂又搬到淳安县航头镇。

1945年9月份，日本人投降仔么，嘉属七县联中搬到嘉兴秀州中学，浙西一中搬去嘉兴，浙西二中搬去湖州复名“浙江省立湖州中学”，浙西三中搬去建德。

1949年8月份，湖州师范并进省立湖州中学里向，分设高中部、初中部、师范部。

1951年3月份，师范部从学校拆出来，单独办学。

1952年7月份，湖郡女中高中部两隻班16人，东吴附中高中部两隻班30人合并进省立湖州中学里向。

1954年3月份，学校初中部搬去横塘（原蚕桑学校）。

1954年8月份，学校改名“浙江省湖州中学”。

1957年夏，初中弗再招生，初中学生仔搭仔部分老师转畀湖州一中咾啥个学堂。

1958年，学校主办“湖州市夜大学”，设数学、物理、化学三隻班。

1976年10月份，十年动乱结束哉。为咾解决办学经费弗足个问题，从七十年代到九十年代初，学校先後办仔炼油厂、钢木家具厂、信达公司、鱼药厂咾啥个。

1981年，浙江省人民政府确定箇所学堂是浙江省十八所首批重点中学里向个一所。1995年12月份成为头一批浙江省一级重点中学。

2002年，湖州中学举行百年校庆。

2004年，弁山校区造好，公费生、自费生开始分校区教学，莲花庄校区畀自费生用，弁山校区畀公费生用。

2009年9月份，莲花庄校区并进弁山校区里向。^[3]原先个莲花庄校区续办民办中学新世纪外国语学校，有得初中部、高中部。

2020年，勒垃吴兴实验中学帮助下头，湖州中学西山漾校区成立，是全日制民办普通高中。^[4]

2022年，新世纪外国语学校撤销，原址续办公立普通高中湖州行知中学，弗再教初中物事。^[5]