洪伟翔

洪伟翔（英语：Ang Woei Shang，1986年12月1号生），马来西亚个执业律师、专栏作家搭时事评论员，勒Facebook、YouTube咾啥个平台浪向有隻叫《翱翔天际》个频道，专门讲马来西亚个政治搭社会事体。

早年搭职业生涯

伊出身勒马来西亚柔佛州笨珍县北干那那，爷老头是开杂货店个。中学个辰光就开始关心政治，后首来读马来亚大学个法律系。毕业仔么，跟过后首来做总检察长个汤米·汤姆斯做实习，後首来自家做挂牌律师搭仔时事评论员，勒《星洲日报》、《中国报》、《光明日报》咾啥个报纸浪开专栏写文章，也是电视台搭网络媒体个常客评论员。

主要活动搭争议

2020年左右，伊开始调频道，原先帮反对党（安瓦尔·易卜拉欣搭民主行动党）敲边鼓个，现在反过来批评伊拉。伊公开讲希望联盟（希盟）上台仔么，乱塞人个情况比老早还结棍、对物价飞涨么是死弗认账、对老早答应要处理个案子前言弗搭后语。

2021年，洪伟翔伊独家专访着前总理马哈蒂尔·穆罕默德两趟，掰让伊个名气响仔交关。

2022年搭2023年，伊带头个辩论队连续两年勒“辩论海啸”大赛里向抢着冠军，伊自家啊两趟拿仔最佳辩手个名头。

2022年8月13号到8月17号，洪伟翔自家捐畀北海个威北农民学校500令吉，还通过自家Youtube频道举办线上慈善筹款演唱会，4天里向筹着8万4420令吉捐款。

2023年10月28号，洪伟翔通过Youtube频道搭仔脸书发动线上“翱翔慈善演唱会”，吸引585人捐款，畀光育华小建校基金捐仔11万7561令吉。

2024年7月份，民主行动党古来前市议员兼网红吴启聪勒网上触伊霉头，反转去骂伊是“国盟洗地佬”咾啥个，结果洪伟翔自家弗高兴哉，发律师信叫伊道歉，结果对方弗踩伊，后首来到法院去告伊哉。

2025年8月25号，警察叫伊到武吉阿曼总部去录口供，作为相关交易里向个律师，做证人相帮警察调查桩土地交易个案子。

2025年8月26号，勒伊刚去警察局录好口供后脚，马来西亚内陆税收局（LHDN）就派仔6个人摸到伊个律师事务所。掰帮人勒浪里向拍照、画图，还问东问西，问伊阿有参政、片子勒啥地方拍个咾啥，侪是搭查税浑弗搭界个闲话。洪伟翔勒网浪吼拉吼讲，掰明明就是寻齁势！伊讲自家钞票年年侪交清个，2021年也朆查出来啥问题，做啥现在又要翻老账，从头查2018年个税？伊觉着，十有八九是搭伊嘴巴太老、经常评论政治有关系个。