波阳公园

波阳公园勒垃中华人民共和国上海市杨浦区，全园面积9000平方米，东到贵阳路，西到上海市杨浦区中心医院，北面是波阳路，南面贴隔壁海州路。公园名字从波阳路来个。

历史

1930年，上海公共租界工部局勒乃朝波阳公园个地方买仔土地，计划造乔敦公园，一直呒没造。1944年6月3号，上海市工务局拿乔敦公园基地改造成鄱阳苗圃。1946年初，上海市政府拿鄱阳苗圃、平凉苗圃合并成第五苗圃。1948年，第五苗圃部分地变成上海第二劳工医院。1951年，上海市人民政府决定拿第五苗圃原鄱阳苗圃个部分改造成公园，上海市工务局园场管理处造园科负责公园个绿化设计，1952年5月份对外免费开放。

文化大革命个辰光，公园里向砌窑烧砖，构筑地下防空工事。1973年，恢复公园原本功能，增加售票亭，铺设水泥路，开辟儿童游戏区。1977年，公园重修工作完成以后再开放，改成收费制，后来再变成免费个。