沿塘村（萧山）

沿塘村，是吴越杭州市萧山区瓜沥镇个一隻行政村。

沿塘村东到勇建村，南面靠萧绍运河，西到八大村，北到民丰河村。村域面积1.14平方公里，有村民小组13個，农户556户，常住人口1815個人，暂住人口2623個人（2022年左右）。

歷史

沿塘村民國辰光歸定一乡第十二保，中華人民共和國成立以後是凤凰乡十二村，1957年创办华民、华兴、五星初级社，1957年改成胜利高级社，1958年人民公社化以后，是照东管理区丁村生产大队，1963年是坎山公社丁村生产大队，1984年改成坎山镇沿塘村，2013年三镇合一以後是瓜沥镇沿塘村。

丁村之战

沿塘村东南角丄有個化成禅寺，來夯凤凰山西面1公里，南沙大堤南几十米个地方，開始辰光叫三瑞寺，後歇來改名化成禅寺。1940年1月份，日本軍隊佔領萧山县城。2月17號，浙抗卫第八支队來夯衙前一带畀日本人包围，幾千個官兵基本丄都滅壞哋。第八支队个百把個抗日軍人來夯沿塘村畀日军𧼱牢，后歇来退到化成禅寺，日本人打渠弗壞，就用重炮轰炸，所有将士全部死壞，寺也打成灰哋。

2022年，村民來夯化成禪寺邊丄發現木木佬人个骨頭咾彈殼咾介，經過法醫鑑定是抗日战争辰光浙江抗卫团第八支队阵亡将士个骨頭。同一年寺裏向造勒隻浙抗卫萧山会战阵亡将士公墓纪念碑，還則寺裏向一間屋改成浙抗卫萧山会战陈列馆。2023年，區政府則“浙抗卫萧山会战阵亡将士墓”定爲一般不可移动文物。