河南路桥

2022年上海赛艇公开赛个辰光拍个

河南路桥是中国上海市区苏州河丄座桥，桥北面是虹口区河南北路，南面是黄浦区河南中路，长111.5米，宽29米，是座5孔拱形连续梁桥。

历史

河南路桥老底子是清道光廿三年（1843年）开个摆渡口，叫三摆渡。清光绪元年（1875年），工部局造仔座木桥，叫三摆渡桥。光绪九年（1883年）又拿老底子木桥拆脱，另外造座新桥。因为清朝末年，桥北面造仔座天后宫，故咾也叫“天后宫桥”。民国16年（1927年），老底子座木桥拆脱，改造出座长64.46米，宽18.2米个3孔混凝土悬臂挂孔桥，叫河南路桥。

2006年6月份，老个河南路桥拆脱重造，2009年1月19号造好通车，从四车道拓宽到六车道，“修旧如旧”，用“外挂玻璃纤维混凝土装饰板”工艺对桥身、桥墩、腰线咾啥个按照老桥拷贝出来。

2009年12月28号，刚开始用弗到一年个河南路桥桥墩柱表面装饰板裂开来哉，发现里向是编织袋、水泥块咾啥个交关垃圾。阿末，工程总承包单位上海建工集团畀相关责任人警告、记过处分，罚1－2万块。