沙普电报

沙普电报，是第一套实用个光电报系统，1791年由法国发明家克洛德·沙普发明，用摆臂式信号机传递信息，通常摆勒沙普电报塔上。

系统

沙普电报塔丄个摆臂式信号机

一般来讲，沙普电报由间隔5到15公里个信号塔组成。勒塔顶，立勒根木头桩子，配有维护用个梯子；木桩丄安有一根水平横杆，横杆好绕咾伊个中点转动；水平横杆两面各有一根垂直臂，也好单独转动。发信个辰光，杆组件个一切转动侪好用用绳索完成操作。

为咾接收信号，每座塔丄侪装有两架望远镜来观察上行搭仔下行个信号。根据相邻电报塔个间距差别，望远镜倍率从30倍到65倍弗等。消息发起个辰光，使用密码本进行编码，到目的地塔以后用相同个密码本进行解码。

箇只系统个主要缺点是呒办法勒夜里向或者能见度低个情况下头运行，而且每座电报塔侪需要专职个操作员。

• 
  装置
• 
  望远镜
• 
  操作系统

历史

1778年，法国大革命爆发，法国急需好快速传递军事情报个通信工具。正好1791年3月份，法国发明家克洛德·沙普勒巴黎对箇项技术进行多轮测试，证明伊个可行性。勒伊做议员个阿弟个相帮下头，1793年，沙普获得议会个支持同拨款，到1794年完成第一条连接巴黎到里尔个信号系统，最短只需要9分钟就好让信息横跨230公里路到另外只城市里向。

议会非常欢喜箇只好缩短通信辰光个系统，大力支持沙普电报个建设。1798年造仔巴黎到斯特拉斯堡，1799年造仔巴黎到布雷斯特个沙普电报线。到1844年，法国全国有得534座沙普电报塔，以巴黎为中心，串起29座法国顶重要个城市，覆盖范围超过5000公里。线路更是一路延伸到阿姆斯特丹、美因茨甚至威尼斯。克里米亚战争里向，保加利亚也曾铺设过沙普电报线。

箇是工业时代第一只实用个电信系统，一直应用到1855年畀电报系统取代。