沙善餘
| 沙善餘 | |
|---|---|
| 出生 |
沙慶 1879年 |
| 逝世 | 1968年5月31號 |
| 宗教信仰 | 回教 |
生平
[编辑]沙善餘是南京回回，生勒苏州，4歲个辰光跟牢渠拉爷从苏州搬到上海。渠先后勒垃圣芳济学堂、 格致书院读书。清朝光绪廿九年（1903年），跟牢尚贤堂个李佳白专修英文，后首来当仔助教。光绪三十一年，因为反对美国虐待华工，宣传抵制美货咾，畀李佳白辞退，到复旦公学教英文。[1]沙善餘个英文水平是蛮高个。[2][3]
宣统元年（1909年），上海清真董事会整顿扩充原来福佑路清真寺开办个务本小学，改名清真务本两等小学，沙善餘当学董，负责筹办事体，也兼授课程。[3]1918年学堂搬到小桃园清真寺，改名清真回民学校。[4]
1911年5月份，发起组织清真商团，自家当團长，姪女婿伍特公當副團長，武昌起义以后清真商团参与上海光复个战斗。[5][6]民国元年（1912年）当仔山东高等学堂教务长、校长，民国3年，拒受袁世凯“诏封三品正授校长”咾，回到上海，当仔《神州日报》、《申报》编辑，兼路透通讯社译员搭华商纱厂联合会秘书咾啥。[1]民国20年（1931年），当仔私立敦化小学校长、事务主任搭英文老师，1934年学堂成立仔初中部，扩建成功私立敦化中小学（是难朝上海市黄浦区回民小学搭上海市回民中学个前身）。[1]
沙善餘是中国回教学会发起人之一，畀人推选为学会干事。[3]渠还是《中国回教学会月刊》两個主编之一，箇份刊物主张建社团、办学堂，用教育兴教兴国。[3]渠搭哈德成阿訇、伍特公一淘翻译仔《古兰经》前3卷，勒垃《中国回教学会月刊》丄發表。[1]
1954年，当仔上海市文史馆馆员，还是盧灣區第一到第四届区政协委员。[1]
1968年5月31號，沙善餘走脫，享壽九十歲。[4]
著作
[编辑]《上海回民史料》、《上海各清真寺沿革》、《上海伊斯兰教史》[1]
參考
[编辑]- 1 2 3 4 5 6 （1998年02月）上海市卢湾区志编纂委员会 编：卢湾区志 ．上海：上海社会科学院出版社，988-989．ISBN 7-80618-445-7．
- ↑ 馆员名录名单 (pdf) pp. 38. 上海市文史研究馆. 原始文档勒2025-06-12存档.
- 1 2 3 4 （1997年03月）上海市南市区志编纂委员会 编：南市区志 ．上海：上海社会科学院出版社，1022．ISBN 7-80618-282-9．
- 1 2 马仲德; 杨振华. 回族爱国人士沙善余. 回族研究. 1993, (12): 95–97.
- ↑ 沙鸿瑜（1994年1月）．“怀念可敬可爱的父亲——沙善余”，中国人民政治协商会议上海市卢湾区委员会文史资料委员会 编：卢湾史话 第4辑 ，135-144．
- ↑ （2012年08月）蔡鸿源，徐友春 编：民国会社党派大辞典 ．合肥：黄山书社，390．ISBN 978-7-5461-2303-5．