江心沙（黄浦江）

江心沙，也叫老鼠沙、高桥沙，文献裏向也叫“吳淞內沙”，是老底子上海黃浦江丄吳淞口裏向个一隻沙島，因为伊长唻赛过隻老虫故咾叫老鼠沙。

历史

最早个文献资料是1842年鸦片战争里向打进吴淞口个英国部队个现代水文图，伊個辰光个老鼠沙，起潮个辰光畀水淹没脱，落潮个辰光露出水面，还弗是隻岛。後来么上海开埠，到19世纪60年代，商船吨位越来越大，吃水越来越深，箇辰光呢老鼠沙拿黄浦江分成两根航道——东北伊根航道吃水深，平均水深6.7米，必过狭；西南伊根正好反过来，够阔，但是平均水深弗足1米。箇辰光个高桥沙么，已经开垦出一千九百多亩个地哉。

光緒三十一年（1905年），清政府根据《改订修治黄浦河道条款》成立浚浦工程总局，请荷兰人约翰·德·奈格（John De Ryke）做总营造司。伊么计划勒垃高桥沙南面造堤，拿西南航道冲出来。箇工程1907年春天开工，到1909年基本结束，1910年9月份正式通航，拿高桥沙帮浦东连勒一道。1912年，浚浦工程总局改制成黄浦河道局，简称浚浦局，继续箇個生活。到1917年《寶山縣續志》下限个辰光，江心沙搭浦東當中已經是“潮退時，褰裳可涉矣”。

民国九年（1920年），北洋政府计划勒垃高桥沙造机场，必过浚浦局弗同意，後来变成龙华机场。但箇让附近老百姓发现自家个地弗勒自家手里向，直接引发浚浦局帮附近老百姓个土地所有权个冲突，沙田局帮浚浦局还打起来。阿末呢，判个是土地主权畀政府，土地管理权畀沙田局，土地使用权畀农民，但是勒垃黄浦江边造油池前要向浚浦局买地。南京国民政府成立以后，修约运动直接让土地局拿浚浦局个地侪收转来，大家只好租地去用。

到1937年，沙東面搭浦東老江岸基本丄連牢拉哉。必過，原來个黄浦東河道還勒許，當地人叫渠“老黄浦”，到1966年因爲上海炼油厂發展需要咾，再拿伊填脫。

居民

19世纪沙丄就有人墾荒哉，譬如凌家木橋凌家，高橋顧家、朱家，鍾家弄鍾家等附近糧戶，向寶山縣署繳地價，分別擔着一定數量土地个圍墾權，縣署也擔箇個島取名“黎圩”，劃歸日字廿七圖。箇些糧戶招來个墾荒人，大多數是打崇明咾長江口各個沙洲來个。後首來，有交關墾荒人搭崇明个各個沙丄搬過來，也有打寧波、嵊泗、江北摇舢舨摇过来个。

居民變多以後，聚居点就从頂早个安乐港畔向四面散开，形成仔北新、西新、东新等村；勒垃伊些粮户造个收租储谷仓房邊丄也形成仔朱家仓、顾家仓搭凌家仓等村。勿多常遠，勒垃頂早个聚居点丄又出现仔茶館店、館子搭杂货店，还设仔到浦西个渡口，變成功交通要道咾沙丄向个商业中心，因为店面搭房子多是茅草屋咾，叫草镇。离开草镇东南一兩里路个中兴镇，本来勒垃黄浦东航道当中，是抗战辰光苏北移民个聚居地。

工业

西洋石油公司1919年開始就勒垃江心沙買地造油地。1929年开始，英商亚细亚公司、美商美孚公司、德士古公司、中苏合资光华咾啥个公司纷纷租黄浦江边个地开油库。到三十年代中，江心沙丄一半个地皮全畀外商佔脫哉，裏向英商641.3畝，美商300畝，德商182.8畝。1938年4月份，日石、小仓、三菱、丸善等日资财团集股组建“日本石油联合股份有限公司”，11月份，丸善株式会社貤强行圈占仔靠300亩地皮，建立上海制油所。當地人爲仔保牢耕地，還生怕油池爆炸咾，對外商个行爲發起過抗爭。

太平洋戰爭爆發仔么，东洋人跑过来拿箇眼西洋个企業全佔脫。抗戰勝利以後，國民政府經濟部資源委員會拿日本企業收歸國有，改造成上海炼油厂，1946年5月份组建中国石油有限公司。1948年4月5号，中国石油有限公司提出《新建上海炼油厂计划书》，计划进口两套日炼原油200吨个炼油设备，周边个外企通过美国大使馆施压，失败哉。上海战役以后么，上海军管会接管。1954年10月19号，上海炼油厂炼油装置改扩建完工。改革开放以后，1981年11月6号，高桥石化公司勒垃高桥化工厂成立，里向有得上海炼油厂、高桥化工厂、上海第二化学纤维厂咾啥个企业。

另外，1958年勒垃边浪草镇成立上海农药厂。