欽璉

钦涟（约1684年—约1745年），浙江长兴人，清朝官员。

生平

欽璉个生卒年份无得明文记载，必过根据渠个文集《虛白齋詩集》好推断：乾隆甲子年（1744年）个辰光渠“六十初度”，盖咾渠应该是康熙廿三年（1684年）生个；同治《长兴县志》里向讲渠“年逾六十卒”，外加沈德潜搭《虛白齋詩集》作序个落款是“乾隆乙丑春三月”，就是1745年春天公，序文里向朆提到欽璉已经过世，盖咾渠可能是1745年春天公以后过世个。

雍正元年（1723年）癸卯恩科进士。雍正四年（1726年）担任新设个南汇县知县个职务，雍正十一年（1733年）再任同职，期间以工代赈重筑原里护塘个预备塘，并改名为钦公塘。次年由杨羾天接任。

纪念

为仔纪念欽璉修筑海塘，浦东各团全有纪念渠个祠堂。难朝只挺落来一隻欽公祠，勒垃浦東新區曹路镇。根據《上海宗教志》，清朝光緒兩年，爲仔纪念欽璉，勒垃龍王廟濟手面增建仔钦公祠。1988年，大殿恢復，拿廟搭祠堂合垃一淘，叫龍王廟，1990年重新開放。

老底子每年八月十八祭祀龙王，十月十五祭祀钦琏，十五、十六两日有庙会，叫“钦公会”，邪气闹猛；钦老爷出巡是模仿清朝知县出巡个，各个镇丄全有祭场，沿牢钦公堂望南，到南汇县祝家桥，再到川沙城厢，再沿牢里护塘一路望北，到搭高桥搭界个五号沟。難朝十月十五香客會得到曹路镇个龍王廟祭祀欽公。

2025年2月份，曹路历史文化馆勒垃浦东新区曹路镇川沙路845号開張，裏向有專門紀念钦琏个钦琏纪念馆。