樓正華

樓正華

樓正華（1906年5月16號—1986年），也呌廷梁、樓雲，字少卿，吳越浙江蕭山（箇卯杭州市蕭山區）人，中華民國政治人物，早年來夯福建、浙江兩省工作，抗戰結束之後當過浙江省平湖縣縣長，1949年宣佈起義。

生平

樓正華是蕭山樓塔人，仙岩樓氏中祠六房三十三世。蕭山縣立第一高小、杭州崇文中學畢業，南京政治工作人員養成所結業，文治大學、浙江警官學校正科畢業。

1924年，樓正華加入中國國民黨。1926年當總政治部少校科員，1929年通過文官考試，錄取縣長職位。1930年到日本考察警政自治。抗戰个辰光，應陳儀邀請當福建省政府公報室主任，畀陳儀器重。當過浙江省民政廳薦任視察、總政治部少將設計委員、福建省政府編譯室主任兼圖書館館長、福建省政工人員訓練班主任、浙江省建設廳祕書、第三十二集團軍總司令部少將編審主任、內政部警察總署簡任專員等職務。

1943年，蕭山縣政府籌備建立“蕭山縣立戰時初中學生補習學校”（起先是1938年創建，1940年蕭山淪陷之後停壞，1943年來夯河上續辦，第二年改成“蕭山縣立初級中學”，是箇卯浙江省蕭山中學个前身），邀請樓正華當校長，畀樓回話。

平湖縣長

1948年6月，陳儀出任浙江省政府主席，邀請樓正華到省政府工作。中共地下黨員余森文，箇辰光是國民黨第四區行政專員，以前是樓來夯警官學校介節个老師則工作丄个上級，好幾次約見樓，開展策反工作，並建議渠弗可來夯省政府內部工作，要去當縣長。7月7號，浙江省政府任命樓做平湖縣長。7月20號，樓到平湖縣，出任縣長。樓正華主政平湖个辰光，有弗少樓塔同鄉投奔平湖尋飯碗，好星人從此世居平湖。

曾參與策反樓正華个李長風後來在夯《我們協助樓正華起義》一文中寫：「樓正華思想比較進步，願意跟共產黨走。」到1949年初，樓已掌握地方武裝第二、第三兩個自衛中隊則一個特務中隊，還籌着木木佬糧食，準備迎接解放軍。5月4号，海鹽縣長馬憑祖趁車逃到上海去，樓之前曾經策動馬投共咾，中共地下黨擔慌馬會告發樓正華，將樓轉移到嘉興興善寺地下黨員姜正中拉屋裏，安排警察局長趙補天代理縣長。

5月7號，陳伯亮代表中共杭州市委成立“中國人民解放軍杭嘉湖支隊”，樓正華當支隊長。5月9號，樓正華則解放軍取得聯繫，防守新埭鎮个第三自衛中隊宣佈起義。5月11號上晝頭，國民革命軍暫編第八師發覺樓正華投共，派兵包圍縣政府則警察局。箇日晚晝頭，解放軍第二十五軍五十八師進攻平湖，夜快邊攻克平湖，樓正華跟牢解放軍進城開展工作。

新政權建立之後，樓正華積極配合工作，來夯對前國民黨人員个訓練中起了蠻大个作用。6月4號，樓正華調離平湖，到杭州去工作。臨行之前，平湖縣委个四位領導，書記戴奎、副書記兼組織部長秦澤甫、縣長方建烈則宣傳部長齊克飛，來夯縣政府食堂請樓喫飯，爲渠踐行。

中華人民共和國个辰光

中華人民共和國成立之後，樓正華來夯杭州市中級人民法院工作，當過民事科科長。

1981年4月29號，浙江省委同意平湖縣委个《關於平湖縣僞縣長樓正華起義一案的情況報告》，對樓正華則另外參與箇次起義个人員，按起義、投誠人員政策來處理。

1986年樓正華來夯杭州生毛病無有哋。

家庭

樓正華拉爹爹樓秉權（1875年－1950年），也呌槐海，字巨卿，任職警政，也做生意，是樓塔顯戶。樓秉權娶苦竹院俞慶雲拉大囡，生一個囡，夭壞哋，兩個兒子，大兒子就是樓正華，小兒子樓正夏（廷芳），北洋工學院畢業，抗戰介節做第三戰區長官部技士，後來以青年軍中校技術教官个身份退役。

樓正華娶溪埭里（箇卯諸暨市次塢鎮溪埭村）俞瑞森拉囡，生四女五子：郎軒、叔達、叔明、叔遷、叔玄。

還好看看

• 楼正华（1989）．“我跨的第一步”，中共嘉兴市委党史资料征集研究委员会 编：嘉兴解放

．於2023-03-13参阅．