长宁站（上海市）

长宁火车站，勒垃中国上海市长宁区长宁路凯旋路265号，是座已经拆脱个沪杭铁路内环线丄个客运站，勒垃乃朝上海轨道交通三号线中山公园站北面，析置还好看到伊辰光个站台结构。

历史

1915年3月份，为咾拿铁路上海北站（沪宁线）搭仔上海南站（沪杭甬线），专门造仔箇条沪杭铁路，当中有“梵皇渡车站”，因为隔壁是梵皇渡路（乃朝万航渡路）叫箇名字。1916年4月份，大部分路轨、桥墩侪造好哉。1916年11月8号，全线路轨接通。1916年12月4号上半日，上海400多军政要员、工商界人士参观新造线路，勒垃苏州河南面个箇座车站举行通车典礼。民国24年（1935年）定名上海西火车站，简称“上海西站”。

箇站车站弗大，有钢铁造个天桥，占地约莫435平方米，房屋10间，雨棚1所，支桥1座。主建筑是栋钢筋混凝土结构三层楼，二层楼有候车室两间，好容纳毛900人。另外还有客运值班室、行包房、问讯处、广播室咾啥个，有2隻售票房、4隻出口。

1989年1月1号，经中华人民共和国铁道部批准，真如站改名上海西站，原上海西站改名长宁站。1997年正式停运。同年为咾造上海轨道交通3号线，1997年拆脱，乃朝南面有上海轨道交通中山公园站。