李次九

李次九
个人资料
出生	李鵬 約1878年
逝世	1953年

李次九（約1878年—1953年），原名李鵬，字次九，也叫子九，吳越湖州歸安雙林鎮（介歇歸湖州市南潯區）人。

生平

早年

李次九是湖州府歸安縣雙林鎮丄人，1878年左右生。

戊戌變法前後，李次九進到歸安縣學成秀才。渠个同學有王治心、梁希搭俞寰澄。根據陳覺民《光復會黨人錄》，李次九參加嘚《光復會》。王治心講，李次九還到日本遊學過，受着孫中山个薰陶。

清朝宣統兩年（1910年），湖州籌備自治，第二年春天公李次九畀雙林老百姓票選爲雙林自治公所“總董”，拉雙林實施嘚清道、設路燈、禁菸咾介十多隻新措施，渠發動鎮人捐銅錢，創辦嘚第一隻清潔所，還拉總持庵建立嘚新个自治公所，還設嘚隻女學堂。

辛亥革命

宣統三年（1911年），辛亥革命爆發，上海搭杭州光復嘚之後，11月6號，沈譜琴帶領學生軍搭商界自衛團保衛府警察署，第二日，湖州宣告光復，成立嘚沈譜琴領導个湖州臨時軍政分府。11月7號，消息傳到雙林，李次九搭人商量，成立民團，雙林也宣告光復。第二日，成立民團局，李次九當軍政長，雙林自治公所取消脫，民事工作全畀民團局接手。民國元年（1912年）一月份，李次九辭脫民團局軍政長个職務，到杭州當浙江都督府軍事祕書，無得幾許辰光，貤奉命到上海滬軍都督府做生活。

湖州光復嘚三個月之後，上海派俞寰澄、李次九搭嚴濬宣帶兵來接管湖州，俞當軍政分府主任，李次九當吳興縣知事，嚴當祕書長。俞、李到湖州執政之後，派兵到鄉下頭抲土匪，鎮壓脫好幾個壞人，還打擊土豪劣紳。

民國手裏

根據王治心《我的寫作與宗教》，李次九畀渠影響，信嘚基督教。

1919年，通過沈尹默接手，經亨頤校長邀請李次九到浙江第一師範學校當國文教員。後末來，一師學生子施存統拉《浙江新潮》丄發表文章《非孝》，引起爭議，浙江省政府要求免職經亨頤，開除脫陳望道、夏丏尊、劉大白搭李次九，搭箇四個老師呌作“四大金剛”。學生子遊行請願，畀軍警鎮壓，激起學潮；後末來經亨頤搭“四大金剛”自家離開學堂。

黄帝纪年2921年4月22號，省議會議員李次九、王廷揚、阮性存搭林文琴等人發起“省憲期成會”，制定嘚簡章，拉浙江省教育會設立臨時事務所，5月22號，正式召開成立大會。6月3號，浙江省議會選出55個省憲法起草員，搭相同數量个候補起草員，李次九是五個湖州籍起草員裏向个一個。

1937年，李次九接任浙江省民政廳下底个省立貧兒院院長。日本人要打到杭州快个辰光，李次九搭另外幾個教職工，帶嘚五十個孤兒，轉移到金華。

1938年9月份，李次九辭脫院長職務，搭家裏向个人到廣西去投親；1940年夏天公，貤到上海嘚。拉上海避難个辰光，李次九搭老同學王治心搭檔編寫嘚《中國歷代名人傳略》第五冊咾第六冊。第五冊畀青年協會書局拉1941年3月份出版，第六冊因爲上海租界畀日軍佔領嘚咾，到抗戰勝利之後再出版。

中華人民共和國手裏

中華人民共和國成立之後，李次九拉浙江省文史研究舘當舘員。渠是1953年無得个。