李平书

李平书个照片

李平书（1854年—1927年12月23号），本名李安曾，貤叫李钟珏，字平书，号瑟斋，又号且顽、且玩老人，祖籍苏州，江苏宝山高桥镇小浜路李家桥（今属上海市浦东新区高桥镇）人，民国辰光个银行家、政治人物。

生平

李平书小辰光住勒高桥，经历过长毛，21岁去上海龙门书院学习。後些来优贡进官场，做过广东陆丰知县、新宁知县、遂溪知县。1899年，伊支持老百姓反对法国侵占广州湾，遂溪知县个官职开除脱。

1903年，伊来到上海，做江南制造局提调。武昌起义以后，伊帮同盟会联系，参与上海起义，做江苏民政司长兼上海民政总长。1912年7月10号，江苏省政府取消沪军都督。8月31号，李平书个上海民政总长撤销脱。1913年二次革命以后，袁世凯帮租界当局一淘取消伊个租界居留权，伊逃去日本，1916年回国。

伊还做过中国通商银行总董、华成保险公司经理、上海商团公会会长、内地电灯股份有限公司总董、上海城自治公所总董咾啥个，创立浦东同人会（今浦东同乡会），增开城门，拆脱城墙，开办上海医院、闸北水电公司、高桥宝界初等小学、昆山蚕桑学校等公共事业。

1927年12月23号，伊生毛病故脱，公谥号“通敏先生”，葬勒浦东高南乡北印家桥（今航津路南面）。

铜像

李平书故脱以后，上海各界为咾表彰伊个历史功绩，造了隻铜像，是著名雕塑家江小鹣设计个，高3米，底座浪有黄炎培亲手写个铭文。一开始，铜像安置勒南市救火联合会大院里向，1937年淞沪会战爆发以后搬到其他地方去哉。1946年10月26号，抗日战争结束以后，上海华商电器股份有限公司咾啥个集资来勒城隍庙湖心亭举行李平书铜人像落成典礼，后来隻铜人像搬去蓬莱公园，阿末来勒“文化大革命”里向烧脱。