李家巷鎮

李家巷鎮
—  鎮  —
李家巷人民政府搭中共李家巷鎮委 李家巷人民政府搭中共李家巷鎮委
省	浙江省
市	湖州市
县	长兴县

李家巷鎮，是吳越浙江省湖州市長興縣个一隻鎮。李家巷鎮有起拉長興縣東南面，東面靠弁山搭洪橋鎮搭界，南面搭湖州市經濟開發區搭界，西面咾北面搭呂山鄉咾開發區搭界。

歷史

傳說李家巷古辰光叫上田村，後首來有個姓李个四川人從湖州太子灣搬到介歇鎮南个太平橋，發展成村，後末來河港堵牢勒咾，搬到南港搭北港頭當中，因爲姓李个人多，介咾叫李家巷。根據《吳興備志》記載，宋朝辰光个歷史學家李心傳，是隆州（拉介歇个四川）人，蹲拉湖州，造了房子搭墳，取名“太史灣”，伽子孫後代後首來搬到長興个東山。介咾講，叫“李家巷”箇隻名字是因爲李心傳个子孫後代蹲拉許丄。

清朝手裏李家巷歸至德區東南鄉第六圖四十莊，民國手裏建鄉，歸第七自治區管。抗戰个辰光畀日本人佔領，東面是東山鎮，西面是大石鄉，抗戰結束之後鄉鎮合併，重番叫李家巷鄉。解放以後，東面建置李家巷鄉，西面建置長福鄉，1956年合併成李家巷鄉，1958年李家巷人民公社成立。1979年，李家巷自然鎮單獨建置，歸縣裏向管（縣屬鎮），1981年，李家巷人民公社撤銷脫，併到李家巷鎮。

2002年，根據《长兴县人民政府关于同意李家巷镇部分行政村区域调整的批复》（长政发[2002]9号），一、撤銷沈灣村、倪家埭村，組建新个沈灣村，駐原沈灣村；二、撤銷章浜村、楊家橋村，組建新个章浜村，駐原章浜村；三、撤銷許家浜村、凌家浜村，組建新个許家浜村，駐原凌家浜村；四、撤銷石山橋村、石泉村、組建新个石泉村，駐原石山橋村；五、撤銷邵家浜村、陳家浜村、蔣家村、組建新个陳家浜村，駐邵家浜村；六、撤銷莊㘰村、莊基村、老虎洞村，組建新个老虎洞村，駐原莊㘰村。

2011年3月份，湖州南太湖（長興）產業集聚區管理委員會成立，搭李家巷鎮實行“鎮區合一”个運作模式，10月份，設立湖州南太湖產業集聚區長興分區管理委員會，是縣政府派出機構，正科級規格，辦公地址設拉長興綜合物流園區大樓裏向；南太湖長興分區搭李家巷鎮“鎮區分離”，李家巷鎮个老虎洞村、石泉村、廣福橋村、計家浜村搭陳家浜村5隻村坊咾長興綜合物流園區畀南太湖長興分區管。

經濟

李家巷个東南面是山區，礦產豐富，石灰開採个歷史交關長：民國廿一年（1932年）資料寫，箇辰光有8爿石礦，24隻石宕，千把個工人。後首來兼併成大興石礦股份有限公司，公司設拉上海，李家巷設礦場辦事處，李家巷个石礦工業發展到鼎盛。2012年前，李家巷鎮丄有235爿石粉企業，弄得環境蠻弗好，鎮丄104國道个天丄全是塳塵。

2011年9月份，縣裏向派金永良來當鎮長，一年七個月裏向關脫235隻企業，經過各種環境整治，介歇李家巷个環境好得多許唻。

文化

李家巷石泉村歷史悠久，村裏向有三隻牌坊、三隻古橋，還有交關老房子。

李家巷青草塢村主要是平陽人移民，講閩南閒話，龍舞（青草塢雙龍）是浙江省級非物質文化遺產。

基本情況

李家巷鎮个社區搭行政村有：李家巷社區、沈灣村、章浜村、許家浜村、石泉村、陳家浜村、老虎洞村、青草塢村、李家巷村、計家浜村、廣福橋村、劉家渡村搭西坝村。