朱家湾

朱家湾是中华人民共和国上海市普陀区东部一只地名，三湾一弄之一，来勒中山北路北面、光新路帮真如港交会处。清朝中期，有姓朱个搬到虬江（乃歇真如港东段）河弯北岸，当地逐渐有朱家湾箇只叫法。后来朱家湾形成朱家湾前浜、朱家湾后浜两只村。

20世纪，苏州河南岸个公共租界一路向西扩张到小沙渡（西康路苏州河边），交关工廠主来勒小沙渡个苏州河两岸起工厂，外地工人来勒朱家湾一带私自搭棚户，成为三湾一弄棚户区个一部分。因为朱家湾边浪有上海造币厂，有人也叫伊造币湾。

20世纪20年代以后，朱家湾前浜形成朱家湾街（今光新路南段）。1927年，南京国民政府成立，同年7月1号，建立上海特别市，通过一项改善工人住房条件个法案，1928年，上海特别市成立“筹建平民住所委员会”，由政府出钞票造平民住宅，平价或低价卖或租畀老百姓住，叫“平民村”，也叫“市民新村”。朱家湾造个是中山路平民村，规划占地面积3.5万平方米，范围相当于光新路以西，中山北路以北。箇埭原先有一条名叫“赵浦”个虬江支流，部分填脱畀“平民村”用。1936年完成第一期，有57排，330只单元，侪是砖木结构。工程还没结束，淞沪会战爆发，日軍攻佔中山路平民村，當地成為日本人个兵营搭马厩。1945年抗日战争結束，上海市政府試圖收回中山路平民村，必过附近个工人搭瘪三拿以佔用脱。

1953年，上海市人民政府来勒朱家湾一带造工人新村，朱家湾街变成城市道路，北端甘泉新村，南端光复西路，叫光新路。

1987年，原平民村个81只单元住宅拆脱，改造成马路，叫镇平路，意思是消灭平民村。根据上海路名规则，普陀区道路个名字原则上要使用陕西省地名，故咾按照镇坪县改名叫镇坪路。1990年代以后，沙田物业获得平民村土地个建设权，分两期造了“秋月枫舍”小区。上海轨道交通3、4、7号线来勒镇坪路附近有镇坪路站。2007年，苏州河上架起镇坪路桥。