普善山庄

普善山庄是上海历史丄收尸个慈善机构，专门负责收购土地造专门埋无人认领个尸体个坟头，有收尸车，工作人员会得开收尸车兜街寻尸体拉去埋脱。箇家机构每年会得举办几场义演来募捐善款。

1914年，王骏生、李谷卿等人集资创办普善山庄事务所，总部来勒中华新路，意思是“普及善举”。杜月笙、黄金荣等人一度挂名普善山庄董事。1920年左右，普善山庄来勒宝山县买仔180亩土地修坟场，叫普善山庄，同时来勒新民路设立普善医院，来勒彭浦乡设立义务小学，来勒北海路210号设立总办事处，来勒南市设立南市分庄，来勒浦东其昌栈设立浦东分庄，来勒戈登路、康脑脱路路口（乃朝江宁路康定路路口）设立材栈（棺材店）。

1937年，淞沪会战个辰光，普善山庄主事务所搭仔新民路普善医院侪畀日本人炸脱，来勒大场买个坟地畀日军征用做大场机场。普善山庄又来勒虹桥、青浦蟠龙镇租仔眼墓地。抗日战争胜利以后，普善山庄来勒武胜路、大沽路路口设立分部。1954年，普善山庄事务所畀上海市民政局接管，墓地来勒平整土地运动里向畀推脱。1956年，原先普善山庄义冢个地方造起居民区。