方濟各（教宗）

方濟各（2021）

方濟各（拉丁语：Franciscus；西班牙语：Francisco；意大利语：Francesco，1936年12月17号—2025年4月21号）本名豪尔赫·马里奥·贝尔戈里奥（西班牙语：Jorge Mario Bergoglio）是天主教第266任教宗，2013年3月份，当选教宗，之后推行一系列所谓自由化策略，获得交关欧洲搭美国左翼新闻媒体个赞许。弗过，因为伊个交关言论弗符合传统天主教个定义，让一部分教徒对伊弗大满意，认为伊是个左派。方济各搭美国个总统奥巴马之类个左派，关系邪气好，立在欧洲2015年难民危机开始之后，有好几趟要求欧洲敞开国门接收难民。

2025年4月21号當地辰光上半日9點35分，总务枢机凯文·若瑟·法雷尔宣布，方濟各勒垃當天早浪向7點35分个辰光，勒垃聖瑪爾大之家逝世，終年88歲。

名头

贝尔戈里奥拣仔“方济各”第隻名头来纪念亚西西个方济各。圣座特别澄清新教宗个名号是方济各咾弗是“方济各两世”，一個圣座个发言人指出，假使讲下趟出现方济各两世个闲话，再会得拿难朝个教宗个名号改成功“方济各一世”。天主教会有一隻重要个传统，就是教宗会得拣以前教宗个名号当作自家个名号，1978年个辰光若望·保禄一世担第隻传统打破脱哉，渠担两隻前任教宗用过个名号并垃一淘用作自家个名号。若望·保禄一世以前，要到10世纪初，箇辰光个教宗兰铎也选仔全新个名号。《华盛顿邮报》认为贝尔戈里奥选仔一隻朆用过个教宗名号，作兴是要表明天主教会勒垃变革个路丄。