方溪村（蕭山）

方溪村
—  行政村  —
省	浙江
市	杭州
區	蕭山
鎮	戴村

方溪村（Faon Chi Tshen），是吳越浙江省杭州市蕭山區戴村鎮个一隻行政村。是2005年个辰光頂山、征山則增豐三隻自然村合併來个。

歷史

元朝至元十六年（1279年）歸七都四圖、五圖。明朝到清末，仍番按照元制。民國《蕭山縣志稿》有方家莊、外石板溪、裏石板溪村名个記載。民國廿年（1931年）原來个增豐村（方家塘）歸二都十八圖，原征山村（外石板溪）、頂山村（裏石板溪）歸二都廿九圖。民國三十六年歸長潭鄉，增豐村（方家塘）是第五保，征山村（外石板溪）、頂山村（裏石板溪）是第八保。中華人民共和國建立之後一開始是長潭鄉，農業合作化个辰光建立過增豐、永豐則頂山三隻農業生產合作社。人民公社化个辰光增豐、征山則平山村合併成立躍進生產大隊，頂山是頂山生產大隊，都歸戴村人民公社長潭管理區管。1961年7月份縮小公社行政區域，歸雲石人民公社。1969年2月份撤區併社，歸戴村人民公社。1971年2月份，調整公社規模，仍番歸雲石人民公社。1984年5月份，鄉政權設立，建立鄉政府，鄉下底是村，歸雲石鄉，分別是增豐村、征山村則頂山村，各自建立村民委員會。2001年7月30號，雲石鄉則戴村鎮合併成戴村鎮，歸戴村鎮。2005年5月份，三隻村堂合併成方溪村。

基本情況

方溪村來夯戴村鎮西南角丄，三面環山，北面到顧家溪村，南面到尖山下村、駱家舍村，西北面則富陽區搭界。箇卯有農戶510份，1531個人，面積4.75平方公里，耕地120畝，山林5520畝。村裏向姓“陳”个人頂多，接落來是姓“鮑”則姓“顧”，還有姓“丁”个也弗少。

村裏向个增豐自然村有一隻下聞橋廟，是清朝辰光个老房子，廟个東面有一隻下聞橋廟過路亭，涼亭南面溪丄有一隻石拱橋——下門橋。過路亭來夯到駱家舍去个石子路丄，老底子只勒介一埭到駱家舍个山路。

自然村

• 頂山：來夯村西北面，以平頂山命名。原來呌裏石板溪，民國《蕭山縣志搞·疆域·村落》裏向有記載裏石溪村个村名。1950年裏石板溪則頂山混同，合作化个辰光成立頂山農業社，1958年公社化个辰光是頂山生產隊，1982年是頂山村。2005年5月份，則增豐村、征山村合併成方溪村。2007年原來个裏石板溪自然村註銷壞，取名頂山自然村。2014年左右有463個人。
• 征山：來夯村西南面，民國《蕭山縣志稿·疆域·村落》有記載外石溪村个村名，清朝手裏是七都外石板溪，民國手裏鮑憲陶公取“征山”个村名。1949年之後是雲石鄉征山村，1958年併到躍進大隊。1961年是永豐大隊。1984年是征山村。2005年5月份則頂山村、增豐村合併成方溪村。2007年原來个外石板溪自然村註銷壞，取名征山自然村。2014年左右有366個人。
• 增豐村：來夯村東北面，原來呌方家塘。元朝至元十六年歸七都四圖、五圖。民國《蕭山縣志搞·疆域·村落》裏向有記載方家莊个村名。廿世紀三十年代歸二都十八圖。民國三十六年（1947年）歸長潭鄉，1949年5月份之後一開始歸長潭鄉，合作化个辰光城裏增豐農業社，後歇來則增豐、征山、平山合併成躍進大隊。1984年是增豐村。2005年5月份，則頂山村、征山村合併成方溪村。2007年原來个方家塘則下門橋兩隻自然村註銷壞，取名增豐自然村。2014年左右有728個人。

經濟

方溪村山多田少，毛竹資源呆个豐富，老底子大部分村民都做用青竹造土紙个生活。後歇來土紙行業弗相干哋，村民貤開始養老竹加工竹製品賣到外地。

20世紀80年代開始，各地村辦工業興起，方溪村也辦過好兩隻村辦集體企業，比方話：濾油紙廠、竹筷廠、西湖調壓電氣廠蕭山分廠、工藝鞋廠、球拍廠、立絨廠咾介，後歇來因爲資金、銷路、管理等原因停壞或者轉制。改革開放之後，個私企業興起，到2008年有個私企業16爿。