控江路事件

控江路事件，是1979年9月9日上海市个一起恶性刑事案件，是中国大陆死刑复核权下放个导火索咾1983年严打个诱因之一。

事件經過

控江路事件发生勒勒上海市杨浦区控江路搭江浦路交叉路口，还有控江路桥一带。改革开放以后，第搭慢慢变成上海一隻相当繁华个商业集中地。1979年9月9號下半日三點多鐘，上海市崇明县跃进农场青工徐永康勒垃控江路搭江浦路个交叉十字路口，因为抢农民賣个蟹咾发生仔争执。勒垃近边执勤个交通民警搭徐带到岗亭问询，徐弗认错咾，民警畀渠喫仔耳光，引起围观个人聚集咾骚动。虽则后首来民警对自家不当个行为赔仔弗是，但是有眼围观个人原得弗依弗饶，还采取过激个行为，抢民警个警帽咾领章，对民警人身攻击咾侮辱，现场慢慢失去控制。

下半日四點多鐘，杨浦交通队接报增援，出动廿名干警到控江路事发现场维持秩序，畀围观个人宣讲政策咾想要搭渠拉劝离，但是无得用。围观个人对维持治安交通个干警分割围攻，动手动脚，有3名民警当场畀渠拉打伤哉。民警畀人围攻殴打，杨浦交通中队长弗想让事体闹大，朆请示上级，就决定让所有个民警撤离现场。后首来，因为无得人维持秩序，聚集个人越来越多，控江路搭江浦路交汇个十字路口聚仔近2000個人，秩序越加混乱，事件发展到骚乱个程度。有眼不法分子拦轿车，旗杆末拉弯脫，朝公交车厾石头，推翻菜农摊点，还有眼人趁机抢路人个手表、皮包、皮夹，侮辱女人家。

夜到八点钟多点，上海化工轻工公司团委副书记吴家里踏脚踏车到控江路桥丄个辰光，一帮人围过来，到渠个人咾脚踏车全推倒，拖到路边丄，搭渠个手表咾皮夹抢脱，衬衫、奶罩、裤子扯脱，随便糟蹋，吴个奶奶咾小肚皮咾屄咾好几个地方畀渠拉抓伤，受着严重个摧残，后后首来经过联防队员搭群众营救，吴再畀人救出来，送到医院去治疗。八点半左右，杨浦公安分局先后调集80多名治安联防人员咾30名交通干警到现场维持秩序，后首来上海市公安局又调仔200名消防民警赶到现场，劝导围观群众疏散，当场捉牢抢东西、侮辱女人个八個犯罪嫌疑人。箇場骚乱攏總发生仔8個鐘頭，到半夜把再结束。