拯救马来西亚集会：推倒安华

拯救马来西亚集会：推倒安华（马来语：Himpunan Selamatkan Malaysia: Turun Anwar），简称倒安华集会（马来语：Himpunan Turun Anwar），是2025年7月26号马来西亚反对党联盟国民联盟（尤其是伊斯兰党）勒吉隆坡独立广场搞起来个一次超大示威，核心目的是逼总理安瓦尔·易卜拉欣下台。

反对派罗列仔交关理由，主要讲伊呒没兑现竞选承诺、经济搞弗好、物价飞涨、还乱征税（扩大SST），弄得唻老百姓日子难过。还有隻直接个导火线，是伊个政府提出个《城市更新法》法案，被批评会损害老百姓个权益，特别是穷人可能会畀赶出自家个屋里向。

集会花头经

• 反对派号称要来50万人，警方最后统计大概有1.8万人。
• 前总理马哈蒂尔·穆罕默德、穆希丁·亚辛侪来站台演讲，骂安瓦尔。
• 现场有人拿安瓦尔个头像P成“税务超人”（MR C，C代表税务Cukai），讽刺伊只会加税。
• 大家高喊“安瓦尔下台！”（Turun Anwar!）个口号。
• 6隻非政府组织拒绝参加箇隻“倒安瓦尔集会”，讲自家只要求政府承诺进行体制改革，而弗是制造政治动荡

政府个反应

总理安瓦尔本人蛮淡定个，讲掰弗是马来西亚文化，叫大家应该通过选举而弗是上街来换政府。伊还勒集会前头宣布一系列惠民援助措施，比方讲发100林吉特、油价降价、增加公共假期咾啥个。反对派讲箇是临时抱佛脚，壳张箇勒垃讨好老百姓。

集会过后个风波

集会虽然和平结束，但后首来个风波一点也弗少。

秋后算账抓打肖像个人

警方后首来根据《煽动法令》咾啥个老法律，抓脱好几个勒集会浪“鞭打安瓦尔肖像”搭仔发表激烈言论个反对党成员。掰个举动引来交关国际组织（像国际特赦组织）个强烈批评，讲安瓦尔政府讲一套做一套，嘴巴浪讲民主，实际浪向还是勒用老法子打压异见。反对派大佬穆希丁也跳出来讲风凉话，讲：“安瓦尔做反对派个辰光口口声声要废除掰个恶法，现在自家上台了，用起来比啥人侪顺手！”必过柔佛州诚信党主席阿米诺胡达表示鞭打安瓦尔肖像超出仔伊斯兰教个道德搭仔价值观，是用弗文明个方式、仇恨个方式煽动羞辱国家领导人。

“垃圾门”罗生门

搞笑个是，房屋部长倪可敏跳出来讲，集会现场留下来20吨垃圾，清洁工人做到后半夜三点半才弄清爽。

结果，掰句话引来全场嘲笑。反对派算仔一笔账：警方讲只有1万8千人参加，哪能会产生20吨垃圾？难道每个人侪扔仔10多公斤个垃圾勒地浪？伊拉讲倪可敏啊是“数学弗好”啊是“故意摸黑”。