托马斯·爱迪生
托马斯·阿尔伐·爱迪生（英语：Thomas Alva Edison，1847年2月11号—1931年10月18号）是美国历史浪顶顶有名个发明家替企业家。生勒美国俄亥俄州米兰镇，来美国新泽西州西奥兰治走脱。渠雖然出身弗大富裕，但靠自家打拼，发明着留声机、电影摄影机、白炽灯搭交关实用物事，拿美国个工业提升到世界顶尖水平。一般性也普遍认为渠是美国精神个代表人物。
小辰光
[编辑]1847年，爱迪生生勒俄亥俄州个米兰，1854年一家门搬到密歇根州个休伦港以后，渠就勒垃伊搭长大。[1]渠是塞缪尔·奥格登·爱迪生（1804年－1896年，生勒新斯科舍省马歇尔镇）搭南希·马修斯·埃利奥特（1810年－1871年，生勒纽约州切南戈县）个第七個也是頂小个兒子。[2][3]渠拉爺屋裏是荷兰血统，经过新泽西州移民过来个，[4]本来姓拼成“Edeson”。[5]
渠拉太公约翰·爱迪生是個保皇党，1784年打新泽西逃到仔新斯科舍。大概1811年，一家門搬到上加拿大个米德尔塞克斯县，渠拉大大塞缪尔·爱迪生上尉勒垃1812年战争辰光参加第一米德尔塞克斯民兵团。伊拉爷塞缪尔·爱迪生搬到仔安大略省维也纳，后首来因为参加1837年叛乱咾逃到仔俄亥俄。[6]
爱迪生个認字、写字搭算术是渠拉娘教个，渠拉娘原来是個先生。爱迪生只上過几個月个学堂。[7]必过，有個传记作家讲渠从小好奇心老重个咾，大部分知识是渠自家看书学来个。小辰光渠就蛮相信科技个，经常性畔勒屋里向好几個钟头个实验。[8]
爱迪生12岁开始听力出问题哉。耳朵聋个原因有人讲是渠小时候生猩红热搭中耳炎反复发作，朆好好交看过。[9]后首来渠编仔交关花头经讲自家为啥体耳朵聋。渠个一隻耳朵完全听弗见，另外一隻耳朵也基本丄听弗見。听讲爱迪生听音乐个辰光会得用牙齿咬住钢琴或者留声机个木头，通过头骨来感受声波。年纪大哉以后，爱迪生认为耳聋讓渠愈發专注，弗容易分心。现代历史学家咾医生猜测渠可能有注意力缺陷多动症。
参考
[编辑]- ↑ Edison's Early Years. Library of Congress. 访问日脚2025-06-28.
- ↑ Edison, Thomas A., Birthplace. National Historic Landmarks Program. 原始文档勒2011-08-08存档.
- ↑ Bedi, Joyce (2004-04-18). Thomas Edison's Inventive Life. Smithsonian Institution. 原始文档勒2018-04-01存档.
- ↑ （2018-03-07）The Yankee Road: Tracing the Journey of the New England Tribe that Created Modern America, Vol. 2: Domination ．Wheatmark, Inc.，146．ISBN 978-1-62787-519-6．
- ↑ Baldwin, Neal（1995）．Edison: Inventing the Century ．Hyperion，3–5．ISBN 978-0-7868-6041-8．
- ↑ Samuel and Nancy Elliott Edison – Thomas Edison National Historical Park (U.S. National Park Service).
- ↑ Edison Biography. National Park Service.
- ↑ Edison Family Album. US National Park Service. 访问日脚2006-03-11.
- ↑ The medical mystery that helped make Thomas Edison an inventor 档案，存勒互联网档案馆当中。（2020年7月20号）, PBS, October 22, 2018.