徐階墓

徐阶墓
长兴县文物保护单位
所在	和平鎮東山村
分类	古墓葬
时代	明朝
登录	2019年8月8號

徐階墓，是明朝松江府華亭縣人、首辅徐階个墳，勒拉吳越浙江省湖州市長興縣和平鎮，2012年到2014年畀人重新發現，2019年，畀長興縣政府列爲文物保護單位。

歷史

徐階是直隸松江府華亭縣（第歇上海市松江區）人，當官當到內閣首輔、吏部尚書、建極殿大學士。

長興人丁元薦《西山日記》裏向寫許徐階到長興東山來看過墳个事體。明朝崇禎年《松江府志》寫：“太師大學士文貞公徐階墓，萬曆十二年賜葬於長興縣東山，嘉會區之原，遺命不豎牌坊、翁仲、虎羊獅之類，止敕亭兩道。”

2012年，長興文史研究者李士傑根據古書記載，搭當地人畀渠个線索，拉和平鎮東山村考查，發現徐階墳（當地人叫“閣老墳”）；到2014年底，李士傑拉當地發現兩塊石碑，有“明特進光祿大夫柱國少師兼太子太師吏部尚書建極殿大學士贈太師諡文貞徐公墓誌銘”字樣，正式確定該隻墳是徐階墳。當地徐姓老人回憶，徐家門祖丄是松江府人，徐閣老埋拉東山咾，徐家門後代拉徐家㘰門定居；中華人民共和國成立之前，村裏向還有隻徐氏祠堂，老早辰光松江府个徐氏同族到清明節也會得有交關人到第搭徐家祠堂來祭祖。當地人還講，“閣老墳”是文化大革命个辰光畀破四舊挖脫个。

2019年8月8號，長興縣人民政府公佈第七批縣級文物保護單位，徐階墓畀渠列進縣級文物保護單位。2020年5月份，徐階墓修繕保護工程完成。

墓葬概况

徐階墓坐西朝東，本來應該封閉牢个墓室口子已經損壞脫哉，裏向个物事東西也無得拉哉。