徐汇区图书馆

徐汇区图书馆勒垃中华人民共和国上海市漕溪北路158号，前身是1953年建立个市人民图书馆徐汇区阅览室。

历史

徐汇区图书馆前身是1953年建立个上海人民图书馆徐汇区阅览室，勒垃天钥桥路30号徐汇区文化馆里向。1957年7月15号，叫“徐汇区图书馆”。1959年（也有话是1958年7月1号个）搬到淮海中路1413号原本个上海市报刊图书馆，1961年搬到漕溪北路33号老底子徐家汇圣母院育婴堂里向。到1966年，馆藏图书12.5万册。

文化大革命辰光，改名“前卫图书馆”，1968年4月份关门，藏书五万多本畀垃红卫兵毁脱。1969年，图书馆帮区文化馆个业余技校、区工人俱乐部科技协会合并，改名“徐汇区工人科技馆图书阅览室”；1973年5月1号恢复建制，箇辰光只挺3.75万册图书哉。

1990年12月29号，徐汇区图书馆搬到新造个南丹东路80号，有得南北两座大楼，当中是座六层楼个书库，面积约4600平方米，有得阅览座位800多隻。南楼么有外借室、社会科学阅览室、自然科学阅览室，北楼为少儿玩具图书馆、老年阅览室、青少年阅览室；其他地方还有视听馆、报告厅、展览大厅、屋顶花园咾啥个。箇辰光徐汇区图书馆藏书27万本，订阅报纸191种、期刊931种。1998年8月份增加盲人阅览室，有得盲文图书、有声读物，开办盲文培训班、盲人电脑学习班等，提供送书上门服务。2002年7月份，加入上海市中心图书馆体系，帮上海个主要图书馆实现通借通还。

2009年到2013年，徐汇区图书馆藏书数量增加交关，从53.5万册增加到78.8万册、工作人员从54人增加到88人，必过借书人次、活动参加人次咾啥个“产出”指标增加唻弗多，是全市少有个三家总体效率退步个区级图书馆。2015年开始，徐汇区图书馆进行数字化转型，买仔几隻电子书数据库，开新浪微博、微信平台账号，设立多隻馆外服务点，提供相关图书个借阅，比方讲勒垃龙美术馆服务点摆艺术类图书、勒垃龙华医院服务点摆医疗类图书。因为面积小，交关书只好囥勒书库里向；开展活动个辰光，场地也明显弗够用。2019年12月31号，徐汇区图书馆南丹东路馆舍结束运营，原先计划进行大修。

2021年，徐汇区委决定拿漕溪北路158号、徐家汇源核心地块畀徐汇区图书馆开新馆。2022年12月23号，搬进徐家汇书院。

外部链接

• 上海图书馆事业志 档案，存勒互联网档案馆当中。（2016年6月27号）
• 徐汇区图书馆^{[链接坏脱]}