归安文庙
归安文庙是老底子浙江湖州府附郭县归安县个县学文庙，有拉介歇个浙江省湖州市吴兴区月河街道建设路1号，箇块地方介歇是东风小学南园校区（原来个南园小学），本来个建筑只剩脱清朝手里造个棂星门，2003年8月份成为第一批湖州市文物保护点。
历史
[编辑]归安县学是北宋崇宁年间设立个，一开始附设拉湖州州学，元代泰定二年（1325年）县丞完泽溥化搭渠迁到县治东南一里月河河畔，就是介歇个地方。[1][2]后世弗停增修，规模越来越大。咸丰年间（1864年）許丄是太平天国幼王撤退到湖州之后阿末一个大本营个地方。
归安县学作为县学用到光绪廿八年（1902年），之后全国个学堂改制，县学撤销脱，文庙专门用作孔庙，外墙是砖红颜色咾，俗名叫“红墙湾”。1917年改建成吴兴县劝学所，总揽县教育行政工作，1923年改名吴兴县教育局，1928年也当作新成立个吴兴国术馆馆址。1932年，箇辰光个考试院院长戴季陶集资重修。1935年教育局迁到东街县政府合署办公。抗日战争爆发之后，1939年改成县立第六小学，到难一直是学堂所在地。
清末个辰光归安县学学额是廪生廿名、增生廿名搭进额四十两名，[3]县学附设学田搭学地，地租用来资助贫困学生子搭日常开支。
建筑
[编辑]
根据清康熙十二年（1673年）、光绪八年（1882年）《归安县志》记载搭里向个图片，归安文庙勒拉湖州城里东南面，搭原来东街北端个归安县署弗远，文庙地跨泮河（也叫前河）搭后河两条河港，南北分别到安学前搭学宫兜，大成门、大成殿搭明伦堂等主体建筑四面环水。
原来个文庙布局是前庙后学，清康熙手里中轴线上依次是万仞宫墙（东、西、南全有一隻牌坊，东西木牌坊分别叫兴贤坊搭仰圣坊，南面石牌坊题“斯文在兹”）、棂星门、泮池、泮河搭泮桥、大成门（东面是名宦祠，西面是乡贤祠、土地祠）、大成殿（前头有东西庑）、明伦堂（前头东面有经义斋，西面有治事斋）、后河搭桥、敬一亭（光绪个辰光已经废脱许嘚）搭尊经阁。拉棂星门搭大成门东另外设学门、仪门通到明伦堂，尊经阁东面有启圣祠（后末来改名崇圣祠），射圃拉院子外头东南面（光绪个辰光已经废脱许嘚），另外还有文昌祠、忠义祠、节孝祠、教谕署搭训导署咾啥。[4][5]
介歇个建筑只剩脱棂星门中门搭西侧门，包括柱子、横额搭门槛，全是花岗岩质，始建年代弗清爽，本来是一间，明洪武五年（1372年）重建个辰光改成石柱，十年（1377年）改成三间，[6]天顺元年（1457年）全调成石柱，同治十年（1871年）两边门畀大风毁脱，第二年重修。[7]院子里向剩脱假山一隻，边丄有几棵古树。另外拉飞英公园碑廊里向有明嘉靖四年（1525年）《归安县重修儒学记》咾清嘉庆十年（1805）《归安学重修泮池记》两方搭界个碑刻，保存比较完整。
-
老照片（黄笃初拍个） -
古树（皂荚） -
古树（榉树） -
古树（丹桂） -
假山 -
假山搭柱础、抱鼓石咾啥个零散石构件 -
假山山顶 -
院子里向个操场
参考文献
[编辑]- ↑ 清·姚时亮、何国祥纂修，《康熙归安县志·卷七·学校志》：“归安县学宋附州学，元泰定中县丞完泽溥化改建于县治东南月河之畔。”
- ↑ 清·李昱修，陆心源纂，《光绪归安县志·卷三·学校》：“宋崇宁中附学，见续图经。……元泰定乙丑县丞完泽溥化始迁于县治东南一里月河，殿堂门庑规制略备。”
- ↑ 《光绪归安县志·卷三·学校》：“学额，廪生二十名、增生二十名、进额四十二名。”
- ↑ 《康熙归安县志·卷七·学校志》：“今中为先师庙，两翼为东西庑，前为戟门、为泮池，又前为棂星门，门外有石牌坊一，地址直抵官河，东西有木牌坊二。学署中为明伦堂，后为尊经阁，东为经义斋，西为治事斋，南为号舍，迤东而南为教谕廨一，西为训导廨二，今教谕廨在明伦堂西，训导廨废，前为敬敷门，又前为仪门，又前为学门。射圃在学门外大街东南。”
- ↑ 《光绪归安县志·卷三·学校》：“崇圣祠在尊经阁右，……旧名启圣祠，雍正二年奉上谕，追封先师五代增肇圣、裕圣、诒圣、昌圣并加王爵，更名崇圣。敬一亭旧在尊经阁前，……今废。文昌祠旧在仪门左，今移建于明伦堂西偏。忠义祠在明伦堂东，……今圮。节孝祠在学东南，……今圮。射圃在学东南，……今射圃废。”
- ↑ 《康熙归安县志·卷七·学校志》：“明洪武五年知县罗至刚置棂星门……十年知县陈良增棂星门为三。”
- ↑ 《光绪归安县志·卷三·学校》：“洪武五年知县罗至刚重建灵星门，易以石柱。……十年知县陈良增棂星门为三，天顺元年知县陈譲易以大石柱三对。同治七年知府杨荣绪申详重修，中为大成殿，两翼为东西庑，前为大成门，为桥，又前为棂星门（左右二枋同治十年遭大风毁，十一年重建）。”