庄顺昌

庄顺昌（1933年6月16号生），中国科学院中国科学院新疆理化技术研究所研究员，享受国务院政府特殊津贴专家，中国共产党员。庄顺昌个研究领域是半导体敏感材料搭元器件，做过中国科学院物理所半导体敏感器件室副主任、主任，兼任中国电子学会理事、中国电子学会敏感技术分会热敏专业组组长。曾做过新疆维吾尔自治区第六届、第七届人民代表大会委员。

早年生涯

民国廿二年（1933年），庄顺昌出生勒江苏省松江县（乃朝上海市松江区）个普通家庭里向，爹爹是石匠，爷是长工。1951年，庄顺昌去东北工学院，读个是机电系。

1955年，大学毕业个庄顺昌畀分配到中华人民共和国重工业部有色金属工业管理局新疆有色金属公司。伊来勒新疆可可托海、阿勒泰等地出差考察。1958年，庄顺昌畀抽调去西安交通大学工程物理系，进修核反应堆个设计。

科研生涯

1962年，完成学业个庄顺昌又去新疆，畀分配到中国科学院新疆物理所，是中国科学院新疆分院个首批科学家，参与半导体个研究。1965年，中华人民共和国第七机械工业部通过中国科学院新技术局向中国科学院新疆物理所下达“651-82”研制任务，为东方红一号卫星研制热敏电阻，庄顺昌作为学术带头人，来勒研究人员态度消极，对研究前景弗看好个情况下头组织起廿几人个课题组。

工作开始以后，碰着文化大革命，庄顺昌畀扣上“走白专道路”“业务挂帅”“以生产压革命”个帽子，课题组成员因为弗同原因选择退出，只挺4家头，还因为学术观点弗同分成两派，研究机构瘫痪、设备落后，必过研究一直呒没停下来。1968年，庄顺昌帮俚个课题组研制出热敏电阻玻璃密封新结构，第二年完成试制。箇只结构用勒东方红一号卫星浪，保障东方红一号卫星个发射。

为东方红一号研制热敏电阻以后，庄顺昌继续座半导体敏感材料搭元器件研究，主持、参与研发、制造超过廿种好用勒人造卫星、运载火箭浪个低温（20K到300K）、中温（-80°C到150°C）、高温（300°C到900°C）热敏电阻。庄顺昌也参与过制定直热式热敏电阻中华人民共和国国家标准。1984年以后，庄顺昌主要参与研制线性互换热敏电阻、高性能负温度系数（NTC）热敏电阻等材料，创造热等静压新工艺。

1983年，庄顺昌加入中国共产党，同年成为新疆维吾尔自治区第六届人民代表大会委员。1984年，庄顺昌被评为新疆维吾尔自治区优秀共产党员搭新疆维吾尔自治区优秀专业技术工作者。1986年，庄顺昌被评为全国优秀共产党员。1988年，伊成为新疆维吾尔自治区第七届人民代表大会委员。1988年到1999年间，庄顺昌获得新疆维吾尔自治区有突出贡献个优秀专家11埭。