屯溪清真寺

屯溪清真寺，是安徽省黄山市屯溪区个一隻清真寺，黄山市难朝只有箇一隻清真寺。

历史

屯溪清真寺个前身是长亭巷清真寺。民国8年（1919年），芜湖人马国友跟牢爷娘搬到屯溪，是当地头一份回民人家。民国10年（1921年），太和县回民马民导到屯溪，后首来回民人数有所增加，到抗日战争前头有廿来個人。民国27年（1938年），定居回民有靠三百個。同一年，设立清真寺，从安庆请仔王世福阿訇来当教长。

1943年7月份之后，重修清真寺，改名回教堂。民国三十八年（1949年）之后恢复清真寺个名头。中华人民共和国成立之后，清真寺原得勒垃长亭巷24号。1987年，卖脱长亭巷清真寺，勒垃徽山路搭仙人路路口买地造新寺。1999年，从河南聘请黄诚仆阿訇当屯溪清真寺教长，2000年6月15号屯溪清真寺正式对外开放。

建筑

新清真寺是1992年造好个，占地面积1067平方米，建筑面积596平方米，礼拜殿300多平方米，附属店面房270多平方米，有大殿、水房、卫生间、广场搭清真饮食网点。