宜川路

宜川路街景

宜川路勒垃中華人民共和國上海市普陀區、靜安區，南起普陀區交通路，望北穿过沪太路么进仔靜安區，到大宁灵石公园连勒万荣路丄。宜川路原本是农田，南段东面老底子是赵家花园咾平房咾啥个，1954年修宜川新村个辰光造个箇条路（也有话是1945年造个），名字从陕西省宜川县来个，一开始是泥结碎石路面，1957年变成沥青混凝土路面。1982年，延伸到新村路望北。

宜川路个延长西路望南路段勒垃宜川路街道里向，两面是宜川新村四到七层楼个老公房，南段是宜川新村个商业中心，附近是1986年造好个中山北路交通路车行立交桥。1959年，宜川路洛川路路口西面有得洛川路小学，1999年停辦，2002年2月6号，原地改造成上海宜川农贸市场。宜川路洛川路口东面是宜川公园。宜川路延長西路路口个SFC上海影城前身是新上海影都，1989年12月份造好个，1990年2月18日開業。延长西路望北路段勒垃甘泉路街道里向，路边有得甘泉中学、甘霖初级职业技术学校。宜川路沪太路路口西面有得回民中学。沪太路望北是靜安區，北面隻顶头附近是大宁灵石公园。