定（音订）亦称营室，是中国古代星名，指室宿一、二搭壁宿一、二组成个四边形。
《诗经·鄘风》：“定之方中，作于楚宫”。春秋时期个夏历十月初昏，定隻四边形齐巧位于南方中天。农闲辰光人侪征调去营建宫室，个咾又叫“营室”。
营室西墙是室，代表天子宫殿；东墙是壁，代表藏书秘府。后首东壁独立出来，营室难只听室。《史记·天官书》里只有廿七隻星宿，外加只讲营室弗谈东壁，老有可能当时整隻室宿（除脱室，还有别样星官）搭整隻壁宿（除脱壁，还有别样星官）也是併拉一淘个。而古代印度个廿七星宿，有一种算法就是室壁合一。
