天山公园（上海市）

天山公园是上海长宁区个一座绿地公园，勒垃延安西路凯旋路路口。

历史

1958年,为咾填脱法华浜，勒现在公园个地方挖仔交关土，形成只赛过葫芦个人工湖，叫葫芦湖，勒湖边浪种树开公园。1959年国庆节开园，叫伊法华公园。1965年改叫长宁区国防体育公园。1975年开始叫天山公园，周谷城题个字。

1977年造仔碧波廊。1984年，堆出嵘山、峦山。峦山勒葫芦湖北面，是全公园顶高个地方，山丄个亭子一开始叫山色亭，1989年为咾纪念长宁区同日本大阪府建立友好城市一周年，勒亭子下头立仔块石碑，还开仔一片樱花林，山色亭故咾改叫櫻花亭。嵘山勒垃葫芦湖东面，50米远，高5米。石级纵横交错，太湖石围成个树坛高低错落，种有梓树、白榆、女桢咾啥个乔木，山下头种有油橄榄、蚊母、丝兰咾啥个。1985年，又造仔湖光榭搭仔风光岛。

园内景观

天山公园东门

现有面积6.8万平方米，当中水域面积1.67万平方米，草地面积1.24万平方米。乃朝天山公园免费向游客开放。

荷花池

荷花池

面积约400平方米，池水同葫芦湖通勒，里向种有荷花，设有哪吒闹海、鲤鱼喷水石雕。西南面有只钢筋混凝土结构个六角荷香亭，绿颜色琉璃瓦攒尖顶，翘角、顶上有石荷花，面积16平方米。亭子里向有石头椅子，木头扶手。亭子三面临水，西面是钢筋混凝土平台。池子东北顶头有座石拱桥，长30米，宽6米，勒桥丄好看荷花池搭仔湖岸边个景色。

葫芦湖

葫芦湖

勒垃公园中东部，面积1.67万平方米，建园一开始是葫芦形个，故咾叫箇個名字。湖东部有只风光岛，面积1100平方米，到处是水杉、木芙蓉。

烈士纪念碑

勒垃石拱桥南部，纪念长宁区参加对越自卫反击战牺牲个烈士。碑体是白玉兰花形，高6.1米，用花岗石堆叠个。纪念碑周围种个是栀子花、桂花、茶花、海棠咾啥个。

嵘山、峦山

两座山勒葫芦湖东面。嵘山高5米，用石块堆叠出来个。峦山是嵘山向北个延伸，堆土出来个，顶浪向是山色亭，面积16平方米。1989年，勒峦山边造纪念碑，碑高1米，阔0.4米，高头刻有“大阪府枚方市、上海市长宁区友好城市交流提携周年纪念”字样，周围种樱花树，拿山色亭改名叫樱花亭。

碧波廊

勒垃湖东南面，是亭廊榭台组合建筑，钢筋混凝土结构，磨石子地坪。 

湖光榭

勒垃湖北端，同碧波廊隔了只湖，是榭、亭钢筋混凝土结构组合建筑。   

牡丹园

牡丹亭

2014年改造个，全园有三处牡丹花坛，种植总面积约1100平方米，各色牡丹花卉十几种。牡丹园里向仿古“牡丹亭”是2014年造个，木结构，绿色琉璃瓦攒尖顶。

参见

• 育音堂，原天山公园小白楼改造出来个
• 上海艺术品博物馆，勒垃天山公园里向

外部链接

• 天山公园介绍- 《上海市园林志》