天原化工厂

天原化工厂勒垃现在中华人民共和国上海市长宁区天山路原500号，是中国最早个氯碱工厂。

历史

天原化工厂是化工实业家吴蕴初1929年创建个，取名天原电化厂股份有限公司（天厨味精厂附属工厂），是电化工厂，天原名字是天厨原料个意思，勒垃西白利南路2247号（现在长宁路2365号后门）个地主手里向租仔24亩空地，1930年11月份造好，厂区面积25.33万平方米，有得漂粉塔、氢气柜、总变电、锅炉房，吴蕴初做总经理，职工3560名。1931年3月20号，注册正负电极“太极”作为商标。创立个辰光是中国最早个氯碱工厂，中国氯碱第一厂。天原化工厂仓库勒垃原天山路360号，周围造出天原新村、天原二村、天原幼儿园、天原公园咾啥个建筑。

抗日战争个辰光，东洋人个飞机轰炸天原化工厂。1937年9月份下旬，天原化工厂拆运部分生产设备去四川。公私合营个辰光叫“公私合营期间上海天原化工厂”。1958年，大容量立式吸附隔膜电解槽畀中华人民共和国国务院畀仔重大科技成果奖。1968年改名“上海燎原化工厂”，1982年1月份恢复“上海天原化工厂”厂名。市长汪道涵、美术家刘海粟曾畀天原化工厂题词。《天原杯》学生化学竞赛由天原化工厂发起，谢希德颁奖，现在还勒垃上海举办。1997到1998年，天原化工厂发生过爆炸，出过人性命。2000年2月28号，天原化工厂全面停产，工厂搬去金山区上海化学工业区个上海氯碱化工股份有限公司天原厂，原址作为长宁区83号地块，後来变成仁恒河滨花园小区搭仔天山河畔花园，2013年增添杨劲松雕像作品《变化》。原天山路厂区吴蕴初个铜像搬去金山化工区个天原厂。