大陈岛
大陳島（台州话：Da Jin Tau；上海閒話：Da Zen tau），行政浪向隶属于中国浙江省台州市椒江区大陈镇，搿个场化勒垃椒江域区东南52公里个东海海浪。
大陈岛由“上大陈岛”（面积7平方公里）帮“下大陈岛”（面积4.89平方公里）组成，侪属于台州列岛。下大陈岛亦是大陈镇个驻在地。岛上森林覆盖率达50~60%，是省级海上森林公园。
历史
[编辑]第二次世界大战前，大陈岛只是座普通个海岛。
1950年代初，大陈岛勒垃国共两党对峙个顶前头，军事地位相对提升，故咾民国政府修仔交关设施，成立第一所中学中正中学，1953年还修仔卫生所，明显改善岛浪向个卫生环境、居民卫生习惯。
1954年5月7号到9号，中华民国总统蒋介石搭蒋经国咾国防部长俞大维等人一淘，到上下大陈岛搭南麂岛巡视防务，慰问国军，是蒋介石阿末一趟回浙江。[1]
1955年1月份，中国人民解放军攻打一江山岛，国军勒垃一江山岛战役战败，大陈岛弗好防守哉。2月份，中华民国政府担大陈岛丄个2.8万老百姓（包括上下大陈岛、渔山列岛搭南麂列岛咾啥个）全撤退到台湾，进行大陈岛撤退，第眼老百姓畀中华民国政府安置垃台湾各个地方，民国𡍲叫渠“大陈义胞”。撤退前，渠垃拿岛浪向所有房子烧脱水井凿脱炸脱，还埋仔万把枚地雷，故咾中共、浙江大陆方面侪叫箇桩事体是大陈浩劫。[2]1955年2月13号，解放军登陆大陈岛。
1956年1月份，伊辰光共青团中央书记处第一书记胡耀邦提出“组成志愿垦荒队，开发建设大陈岛”。当年1月31号，头一批227名小倌跑到大陈岛丄垦荒，到1960年一拢总有得467名垦荒队员。2013年1月6号，胡耀邦铜像勒垃大陈岛丄揭幕[3]。
参考
[编辑]- ↑ 金延锋 (2016-01-19). "蒋介石最后一次回浙江时间：为何是在1954年". 百年潮 (凤凰网) (2015年4期).
- ↑ 第七节 解放一江山岛战斗. 台州史志网 (2019-05-07). 访问日脚2026-06-16.
- ↑ 胡耀邦铜像在浙江大陈岛揭幕. 中青在线-中国青年报 (2013-01-07).
