大越革命黨

大越革命黨（越南閒話：Đại Việt Cách mạng Đảng）是1965年從大越國民黨裏向分出來個一隻政治黨派。搭大越國民黨一樣，箇隻政黨也以民族生存主義作爲自家個政治哲學基礎。

歷史[编辑]

1963年吳廷琰總統畀人推翻了之後，各種反對黨，包括大越國民黨（下腳簡稱大越黨），重返開始活躍。但是，大越黨個領導人當中出現了結棍個分化，黨個中央在1964年之後就因爲內部分歧，弗再開會哉。

1964年11月14號，一星大越黨黨員（主要是南圻六省地區個年紀輕個），聚到一淘來，成立了一隻叫新大越黨個新個政黨。新大越黨個黨旗搭大越革命黨差弗多，但是有在紅顏色個背景當中加了條黃顏色個帶子。^[1]新大越黨由潘通草當主席，^[2]阮玉輝教授當總祕書。