琉球国
有关箇個条目名称另外个意思，请参看“琉球（分清爽）”。
琉球国是琉球群岛历史上第一尚氏王朝搭之第二尚氏王朝个国号，其国家领土是琉球群岛，通用个言语是琉球言语。迭国家開初单一向明帝国朝贡，弗过，勒拉1609年（明万历三十七年，日本庆长十四年），萨摩藩个岛津氏侵入琉球，强迫琉球人向岛津氏臣服，也拿北面个奄美群岛割畀日本。弗过，为著维持搭明帝国个贸易，明面丄向，还是属于藩属国，蓋咾在明末搭后首个清帝国，琉球是向两方称臣个。立在江户幕府辰光，琉球越加受到日本个影响。明治维新後頭，日本对琉球有兼并个野心起來，先是擔琉球变成自家个保护国，再勒垃1872年改成琉球藩。後頭1874年，借因頭琉球人漂流到台湾，制造事件。到1879年，日本貤直接滅著琉球国，设置著冲绳县在哉，还拿奄美群岛划畀鹿儿岛县。
国名
[编辑]琉球勒垃外交丄用个正式國號是“琉球國”。勒垃明朝碑文里向多用“大琉球國”，清朝个辰光叫“琉球國”。[1]
历史
[编辑]按照琉球自家个历史典籍《中山世鉴》、《中山世谱》、《球阳》丄个神话，琉球群島是天神阿摩美久創造个，伊大囡天孙氏建立天孙王朝，传仔廿五位国王，阿末畀人杀脱，琉球拆贡，一天世界，打相打。阿末是浦添个按司舜天统一全国，变成舜天王，必过伊个事体还有交关神话传说。舜天王朝传仔三代，阿末禅让畀丞相英祖，成立英祖王朝，还击退脱元朝两趟进攻。
英祖王朝传到第4代國王玉城个辰光，伊脾气恘，还加仔交关税收，外岛停脱朝贡，按司起兵造反，分别成立南山、中山、北山，三山时代开始哉。1349年，中山王西威死脱仔么，1350年浦添按司察度上臺。1372年，伊最先派人向明朝朝貢。1390年，宮古島个与那霸势头丰见亲畀中山王国进贡，八重山个也来。1392年，明太祖派闽人三十六姓去琉球，拿造船航海技术传畀中山王国，还住勒久米村形成久米士族。1406年，察度王个儿子畀佐敷按司巴志推翻脱，推舉伊爷思紹做中山王。1416年，巴志征服北山。1429年，巴志征服南山，琉球国统一，王城是首里城。1430年（中国明宣宗宣德五年），明朝正式承认伊统一三山，畀琉球王“尚”箇隻姓[2]，历史浪叫“第一尚氏王朝”，琉球人也有仔姓。箇辰光，琉球国进仔黄金时代，商业高度发达，帮福建、台湾、朝鲜、东南亚、日本进行海上贸易。第七代国王尚德王还征服附近个奇界（喜界岛）、马齿山（庆良间群岛）、古米（久米岛）。[3][4]
15世纪开始，交关倭寇骚扰琉球群岛，海上贸易受到阻碍。1469年，琉球国王尚德故脱，下头人直接拿伊儿子也杀脱。1470年，祖籍伊是名岛个御锁侧官（管财务个官员）内间金丸畀人推举做君主，改名尚圆，勒垃成化七年（1471年）用“世子”个身份畀明朝报告，成化八年（1472年）获得明朝个册封，开始“第二尚氏王朝”。第三代国王尚真王个辰光是琉球又一隻黄金辰光，貿易發達。對外擴張方面也于成果，1500年平定八重山群岛，1522年平定与那国岛鬼虎之乱，1537年拿奄美群岛打下来，让琉球国扩张到整隻琉球列岛，确定北起喜界岛、奄美大岛，南到宫古、八重山群島个琉球史书里向讲个“三省并三十六岛”。伊还确立琉球个官员品秩、朝仪制度、神官制度、赋税制度、行政区划，扩建首里城，废脱殉葬习俗，让按司到首里城来住，弗允许私人有兵器，确立琉球国个政治、经济体制，领仔琉球进入稳定发展个辰光。[5]
1589年，琉球国王尚宁往北面个邻居日本派使团祝丰臣秀吉统一日本。丰臣秀吉发兵朝鲜前，要求萨摩、琉球加勒一道提供一万五千人个兵力。因为琉球是明朝藩属国，伊拿事体通报畀明朝，还畀丰臣秀吉七千人份个后勤物资搭仔军费支援。1603年，德川家康统一日本，建立江户幕府后，琉球拒绝派使团，结果关系弗好哉。故咾1609年（明万历三十七年、日本庆长十四年）个辰光，勒垃德川家康个允许底下，萨摩藩发动庆长琉球之役，拿国王捉到鹿儿岛签《[[掟十五条]]》（掟十五ヶ条），让伊承认琉球是萨摩藩个藩属国，君臣永远忠于岛津氏，每年要畀萨摩藩进贡，再测量琉球，确定琉球每年只好有八万九千零八十六石个领地限制，拿奄美五岛个实际管理权吃脱。[6]琉球国内个亲明派（主战派）後些来侪畀开除脱，还有个畀萨摩藩拿头砍脱。尚丰王十一年（1632年），琉球勒垃畀萨摩占脱个岛丄造馆舍，两国侪派官员管理双方个贸易搭仔税收。琉球国成为萨摩藩个朝贡国，萨摩藩派官员长驻琉球，监视琉球。
1654年，琉球王派使臣到清朝求册封，清顺治帝封尚质王做琉球王，成为清朝个藩属，继续朝贡贸易，必过要让萨摩藩抽成先。
1847年（清道光二十七年、日本弘化四年），阿末一位琉球国王尚泰王登基。1853年5月份，美國海军准将佩里头一趟次到琉球。1854年3月份，佩里勒垃《神奈川条约》里向要求日本开放琉球个那霸外加虾夷地/松前藩个松前咾啥个港口，弗成功。[7]1854年7月11号，佩里跑到琉球，帮琉球国政府用漢文、英文两种文字签订开放那霸港口个条约《琉美修好条约》。後来，琉球国再帮法国、荷兰分别签订《琉法修好条约》、《琉兰修好条约》，琉球个关税自主权无脱，海上贸易个垄断地位被冲击。
1871年，日本廢藩置縣，琉球國畀日本政府当成令制国，划到鹿兒島縣底下。同年，琉球从中国回转去个朝贡队伍碰着台风勒垃台湾岛临时修整，结果发生八瑶湾事件，畀当地人杀脱一大半，日本人故咾搞事体，勒垃1874年发兵登陆台湾岛，搞出牡丹社事件。为咾有箇名分出兵，1872年个辰光，日本拿琉球国王尚泰废脱，改成琉球藩。1875年7月24号，日本内务大丞松田道之到琉球，要求琉球国王停脱对清朝个朝贡礼仪，拿帮清朝个外交关系侪断脱。[8]1879年，日本正式拿琉球吃脱，拿尚泰伊一家门綁去東京。
政治
[编辑]琉球最高統治人是國王，琉球人叫伊“御主加那志”或者“首里天加那志”。王后勒垃佐敷間切有封地，叫“佐敷按司加那志”，太子叫“黃金加那志”，勒垃中城間切有封地。
琉球最大个官是摄政，主要管禮儀，呒啥实际权力。实际丄顶大个官是三司官，帮中国古代个丞相，𣍐让王族个人來做。再下头是表十五人，帮中國六部个部長差弗多。
行政單位
[编辑]琉球全國有得“三省三十六島”。“三省”指个是冲绳岛个中山、南山、北山3部份，正式名字是中頭方、島尻方搭仔國頭方，箇三省就是三山时代个領土；“三十六島”指个是宮古、八重山、與那國、奄美咾啥个。
實際浪向，“三省三十六島”是虛个，呒設省級官員搭仔行政機構。琉球實際浪向个最高行政單位是间切，勒垃省級下头一级别，也叫府。首里三平等、那霸、泊共久米一般合起来叫“4府”，里向没間切个。[9]
間切底下是村，是最小最基础个行政單位。
传统文化
[编辑]言话搭文字
[编辑]
琉球語，特谓是冲绳中央方言，是琉球國个主要言话，是从古日语里向分化出来个。勒垃琉球国个辰光，琉球人一般用夾有少量漢字个平假名记录琉球語，出名个琉歌大集《思草纸》（おもろさうし）就是使用平假名记录个。书面言话来讲，用个是漢字，也会得勒垃外交往來里向用文言文，对日本用候文。琉球國內个行政文書叫辞令书。老底子，辭令書用交关假名來寫。1609年薩摩入侵琉球仔么，受到日本影響，開始用汉字假名混用文来寫。後來勒垃向象賢改革里向，又变成用交关漢字来寫。
明朝清朝个辰光，琉球國弗斷派留學生到南京、北京个国子监外加福州个琉球馆學習中文，語音浪向受到閩語福州話个影響，赛过是閩語文讀音[10][11][12]。
除开漢字，琉球还有自家创个字，是球字。琉球歷史浪还有得一種用勒占卜丄个“琉球古字”，根據琉球傳說，箇是阿摩美久传出来个，原先百来個字，後來只有得17字。[13]
宫廷文化
[编辑]
琉球主要受到中國、日本兩種文化个影響，形成独特个文化。
1537年到1623年（尚清王到尚丰王），琉球官方編纂琉球歷史丄头一部琉歌集《思草纸》（おもろさうし），收錄琉歌1554首。17世紀，短詩样个琉歌盛行，顶常見个樣式是8，8，8，6个30音形式，帮和歌差弗多。出名个琉歌歌人有伊世高（惣慶親雲上忠義）、平敷屋里之子朝敏、向受祐（玉城親方朝薰）、马国器（與那原親方良矩）、向国珍（本部按司朝救）、向傑（東風平朝衛[14]）等人。交关琉歌歌人也擅長漢詩、和歌个創作。
琉球國个舞劇叫琉球舞踊，从歡迎中國册封使个宮廷舞蹈“御冠船踊”来个。琉球兼并仔么，為咾搭與明治以後个舞区分开来，宮廷舞踊叫古典舞踊。[15]1879年，日本废脱琉球藩，古典舞踊里向个杂踊传到老百姓伊面，形成民间舞踊。
琉球古典音乐有得勒垃室內演奏个御座乐搭仔室外演奏个路次乐，主要迎接中國册封使个辰光畀冊封使表演个，是夏德庸（幸地親方賢忠）創立个，廣泛傳播。琉球音樂有湛水流、安富祖流、野村流、闻觉流咾啥个。[16][17][18]
武术
[编辑]
勒垃琉球古代，幾乎所有金屬製品侪好做兵器。[19]
琉球个傳統武術叫手，19世紀往後也叫唐手、唐手拳，是空手道个原型，是閩人三十六姓带得去个中国武术勒垃琉球發展出来个。[20]
外来影响
[编辑]
琉球人欢喜勒垃屋顶摆风狮爷像，勒垃路口摆石敢当[21]。饮食方面，琉球人欢喜吃一种叫泡盛个酒，是泰國来个蒸馏米酒。吃油多个菜，吃猪蹄膀，是受到闽都文化个影響。琉球人欢喜用昆布則是受到日本本土文化个影響。
琉球人用一種叫三线个樂器，原形是闽人三十六姓从福建传到琉球个三弦。伊传到日本就成仔三味线。
参见
[编辑]参考
[编辑]- ↑ 翟金明. 琉球国金石文献述略 档案，存勒互联网档案馆当中。（2021年7月3号）[J]. 形象史学, 2015, 000(002):P.174-182.
- ↑ 沖縄で「向」といえば…. 原始文档勒2011-08-14存档. 访问日脚2012-05-29.
- ↑ 《中山世谱·正卷五·尚德王》：天順五年辛巳、尚徳世高王御即位。尚徳ハ尚泰久第七ノ王子也。
- ↑ 《中山世譜·正卷五·尚德王》
- ↑ 《中山世譜·卷六·尚真王》
- ↑ 《中山世譜·附卷一》
- ↑ （英语）Yanagihara Masaharu（2018）．“"Shioki (Control)," "Fuyo (Dependency)," and Sovereignty: The Status of the Ryukyu Kingdom in Early-Modern and Modern Times”，Roberts, Anthea 编：Comparative International Law ．[Oxford University Press]]，141–160, ос. 155．ISBN 978-0190697570．
- ↑ 《明治前期日中關係史研究》，37~42頁
- ↑ 《中山世譜·首卷·琉球輿地名號會紀》
- ↑ 久米村人的語言. 原始文档勒2021-02-10存档. 访问日脚2025-07-27.
- ↑ （简体中文）陳澤平（2021.5）．《琉球官话课本三种校注与研究》 ．福州市：福建人民出版社．ISBN 978-7-211-08565-1．
- ↑ 王振忠 (2021-09-28). "作為「福語」的琉球官話". 澎湃新聞. Retrieved 2024-06-18.
- ↑ 《琉球神道記 档案，存勒互联网档案馆当中。（2009年5月8号）》，第38頁
- ↑ 東風平朝衛. 原始文档勒2015-09-14存档. 访问日脚2025-07-27.
- ↑ wonder沖縄 観る、聴く、読む～組踊の世界. 原始文档勒2009-11-22存档. 访问日脚2025-07-27.
- ↑ 琉球古典音楽 悠久への誘い. 原始文档勒2011-03-14存档. 访问日脚2025-07-27.
- ↑ 琉球古典音樂家列傳.
- ↑ 琉球音樂家生平簡介[链接坏脱]
- ↑ 《沖縄伝統古武道・改訂版》，仲本政博著。ゆい出版、2007年。
- ↑ 沖縄空手の歴史. 原始文档勒2009-03-10存档. 访问日脚2025-07-27.
- ↑ 李鼎元《使琉球記》，第61頁：入家門前多樹石敢當碣。