萧山中学旧址纪念馆

大坞朱玉泉堂
杭州市文物保护单位
分类	古建筑
时代	清

萧山中学旧址纪念馆勒垃中华人民共和国浙江省杭州市萧山区河上镇三联村大坞朱自然村村口，是座纪念馆，建筑是明朝末年造个，清朝后期重建个朱家门个家庙玉泉堂，抗日战争里向，浙江省萧山中学个前身萧山县立战时初中学生补习学校搭仔萧山县立初级中学勒垃民国32年（1943年）到民国34年（1945年）个辰光拿学堂个建筑搬过来，2016年变成纪念馆。2022年9月26号，“大坞朱玉泉堂”进仔第七批杭州市文物保护单位。

历史

萧山中学旧址纪念馆勒垃个大坞朱玉泉堂也叫大坞朱朱氏家庙，明朝末年造个，清朝后期重修个，是朱家门个家庙。抗日战争个辰光，民国27年（1938年），萧山县抗日自卫委员会勒垃龛山镇（乃朝勒垃杭州市萧山区瓜沥镇里向）设立萧山县立战时初中学生补习学校，是萧山县头一所中等学堂，是浙江省萧山中学个前身。民国29年（1940年），日本军偷渡钱塘江，打进城厢镇，学堂停办。民国32年（1943年），学校跟咾萧山县政府到伊临时办公地河上镇凤坞村附近个大坞朱玉泉堂重开，培养抗战人才。民国33年（1944年），变成萧山县立初级中学。民国34年（1945年），日本投降，学堂搬进城厢镇，接管日本傀儡政权个县中学，校舍也搬过去哉。学堂勒垃玉泉堂办学个箇三年里向，学生子拿附近农民屋里向当宿舍，除开读书还要帮忙下田里向，还要进行抗日救亡个宣传活动。

2004年、2016年，玉泉堂重修两遍。2016年11月13号，萧山中学旧址纪念馆勒垃玉泉堂开馆。纪念馆里向分成“战中”追忆、辉煌萧中、勿忘国耻、人文河上四隻展区。“战中”追忆展区拿原本教师办公室、教室个样子摆出来，辉煌萧中展区摆个是萧山中学校个物事，勿忘国耻展区展示个是萧山抗战相关个，人文河上展区是河上箇地方个人文、风景。

2022年9月26号，“大坞朱玉泉堂”进仔第七批杭州市文物保护单位。

建筑

有“自强不息”四個字个外立面

萧山中学旧址纪念馆用个是大坞朱玉泉堂，箇勒垃中华人民共和国浙江省杭州市萧山区河上镇三联村大坞朱自然村村口，是砖木结构，坐北朝南，绞圈房子，占地517.96平方米，好分成前厅、看楼、寝堂三部分。前厅正门个匾额丄写有“朱氏家庙”，两面刻有狮、象，明间是隻戏台，顶浪向藻井内圆外方，有彩颜色个云龙纹；寝堂面阔五间，写有“玉泉堂”。纪念馆正门左面加出来隻长毛2米5个师生雕塑，右面多出书本个雕塑，外墙丄按照河上《人文集》个记载写仔“自强不息”四個字。

参考文献

维基共享资源里向寻得着搭该篇文章搭界个多媒体资源：

萧山中学旧址纪念馆