江苏药水厂旧址

江苏药水厂旧址是勒垃中華人民共和國上海市普陀區个历史建筑。

厂区特征

江蘇药水厂旧址原本面积约25平方米，总建筑面积约5000平方米，主要建筑有一层钢混结构厂房、办公楼、职工宿舍，现在只有原先个一幢办公楼，勒垃同济大学第二附属中学校园里向。建築是二层砖木结构洋房，建筑单体占地384平方米，建筑面积705平方米。办公楼坐北朝南，贴牢河浜，曾经有得三根煙囪。建筑门窗侪是木头做个。

历史

江苏药水厂（Kiangsu Chemical Works）是英国商人美查勒垃清朝同治十三年（1874年）开办个，一开始叫美查制酸厂，生產硫酸、硝酸、盐酸，是中国第一家外商开设个化工厂，也是上海开埠以后第一家化工企业。药水厂一开始设勒上海公共租界里向个新闸桥。因为药水厂排放有毒有害气体，畀工部局责令搬迁。光绪三十三年（1907年）冬，药水厂搬去小沙渡，也就是现在个宜昌路550号。民國24年（1935年）停产，民國30年（1941年）太平洋战争爆发，日军接管江苏药水厂。日本投降以后，江苏药水厂还畀英商。1954年改成地方国营，改名地方国营上海江苏药水厂。1962年停產，1963年关脱。1980年代开始，上海对江苏药水厂舊址进行改造，原江苏药水厂旧址改造成西康路小学、普陀中学，後來又变成同济大学第二附属中学一部分。2009年6月份，江苏药水厂旧址成为第二批普陀区登记不可移动文物。