嘉興清真寺

清真寺
嘉兴市文物保护单位
所在	浙江省嘉興市
坐标	30°45′47″N 120°45′14″E
分类	古建筑
时代	明
登录	1981年

嘉興清真寺，也叫眞敎寺（明朝）、禮拜寺（清朝）、回敎堂（近代），是伊斯蘭敎有拉吳越浙江嘉興个一隻清真寺，嘉興市文物保護單位，嘉興介歇只有介一隻伊斯蘭教古寺。

歷史

明朝萬曆三十年（1602年），馬仲律等人捐鈔票，拉嘉興通濟橋南模仿杭州真敎寺个形制，造仔隻清真寺。清朝乾隆手裏，嘉興个回民人口多起来，元來个寺弗夠用嘚咾，清真寺進行兩趟整修擴建。清朝末年，拉長毛造反、各地回民造反之後，嘉興無得幾許回民許嘚，宗教活動也敗落脫嘚。廿世紀初，從河南、山東來个回民拉嘉興定居。1936年《浙江新志》講嘉興縣有男女穆斯林一百廿八個人。

1943年，嘉興效仿河南教門，也開辦嘚清真女學，周口人楊慧貞（原來呌王蓉，婆家姓楊，是開封人）當頭一個女學阿訇。1946年，渠脫離教務，創辦嘚嘉興回教教養院，收容老弱婦孺，頂多个辰光有百把人。1948年，郭清心搭堂兄郭清魁（兩家頭全是河南開封張莊人）爲嘚逃避戰火，搭開封河南阿文專修學校个八十多個學生子到嘉興，拉嘉興辦嘚一年兩個月，1949年12月份解散脫。無得幾許辰光，郭清心貤畀嘉興清真寺聘用，做嘚30多年。

中華人民共和國成立之後，1951年成立嘉興伊斯蘭協會，1953年整修嘉興清真寺，主要是修大殿搭講堂。文化大革命个辰光，清真寺畀人嚴重破壞脫。

1981年1月份，嘉興清真寺畀政府公佈爲嘉興市市級文物保護單位。

歷任敎長（阿訇）

陝西馬（佚名）、馬肇昆、張朝眞、宛捷三（完捷三）、張祥臣（張瑞生）、楊慧貞（女个）、郭清心、王乃文、李傳林、郭清傑、丁存志等。

建築

嘉兴清真寺有拉嘉兴市南湖区环城东路469号，属于大年堂区域。

清真寺面積三千多平方米，有明代江南庭院建築風格。清真寺坐西朝東，主體建築由東向西分別是照壁牆、門樓、拱券門、講堂，講堂北面是殯殮間搭辦公室；南面次軸線由東向西分別是男女水房、井、亭子搭男女禮拜殿。水房搭禮拜殿南面是清真女學，是穆斯林女人家做禮拜个場許。男禮拜堂東面亭子裏向有塊石碑，正面是明朝萬曆三十年《嘉興府建真敎寺碑記》，反面是清朝乾隆四十年（1775年）《重建嘉興府禮拜寺碑記》。文革个辰光，清真寺大門、照壁牆、二門上刮額匾全畀人敲脫，只有石碑無得事體，1981年个辰光從牆頭裏向弄出來，重新安置過。