喜洋洋搭乐融融

喜洋洋和乐融融是中华人民共和国第十五届运动会、中华人民共和国第十二届残疾人运动会暨第九届特殊奥林匹克运动会个吉祥物，是广州美术学院视觉艺术设计学院院长刘平云个设计团队设计垃个，2024年11月9号公布个。因为长唻赛过隻鸡，网浪向侪叫伊“大湾鸡”。

设计

现实当中个中华白海豚。

设计者刘平云是2022年北京冬奥会吉祥物冰墩墩、雪容融个设计总执行。2024年6月份，刘平云接到箇隻设计任务，辰光短、任务重，只畀仔弗满5隻号头就要搭团队一道做出来。

吉祥物原型是中华白海豚，一种生活勒珠江口个中国一级保护动物。刘平云认为，中华白海豚群居个生活习性帮团结拼搏个体育精神正好合适，伊名字里向个“中华”代表“故土”“家园”。因为中华白海豚运动箇辰光血管会得充血，看起来变成粉红颜色个，故咾吉祥物设计成一白一粉。吉祥物头顶心有三朵小水花，代表箇趟全运会、残特奥会个三隻主办地：木棉花个红代表广东省、紫荆花个紫代表香港特别行政区，莲花个绿代表澳门特别行政区。心形个尾巴有“全民参与全运”个理念。

两隻吉祥物个名字“喜洋洋”、“乐融融”意思是“喜气洋洋、其乐融融、团圆和美”。

应用

摆勒香港金紫荆广场个十五运会、残特奥会吉祥物“喜洋洋”搭仔“乐融融”

2024年11月9号，喜洋洋搭仔乐融融勒垃第十五届全国运动会、全国第十二届残疾人运动会暨第九届特殊奥林匹克运动会倒计时一周年仪式高头正式发布。接下来，粤港澳三地慢慢交出现带箇两隻吉祥物元素个装饰。

2025年11月9号，中华人民共和国第十五届运动会勒垃广州举行开幕式，学生子勒垃台高头穿仔布偶衣裳个吉祥物，自行发挥，效果相当好。比赛个辰光，勒垃体育场馆里向也有得当地大学生志愿者戴仔头套演喜洋洋、乐融融，伊拉更加“放得开”。

反响

因为伊长唻赛过隻鸡，网浪向侪叫伊垃白切鸡、豉油鸡，合起来叫“大湾鸡”。设计者刘平云一开始担心大家拿吉祥物看成吃个，故咾特谓选择中华白海豚，必过还是畀人认成鸡哉。後首来，设计团队也接受“大湾鸡”箇隻讲法。

十五运会箇辰光，两隻吉祥物勒垃互联网浪向邪气行，获得了逾411亿点击量，还开发吉祥物衍生产品，到2025年11月30号已经卖出去超过8亿人民币哉，盲盒商品也卖唻断货。广州市人民政府副秘书长朱小燚表示，广州市计划打造“十五运会吉祥物永久IP公园”，拿箇两隻吉祥物变成功大湾区永久文化IP。