哪吒之魔童闹海

《哪吒之魔童闹海》，貤叫《哪吒贰之魔童闹海》，简称《哪吒2》，是2025年上映的个中国奇幻喜剧动画电影，是2019年电影《哪吒之魔童降世》个续集，由饺子执导兼编剧。箇部电影以明朝小说《封神演义》为基础，主角原型是中国传统神话人物哪吒，讲述哪吒同敖丙经历“天劫”以後，历经重重困难同敌对势力抗争个故事。

发行

2025年1月7号，《哪吒之魔童闹海》公布头一支預告片。2025年1月26号，伊發布第二支預告片。2025年1月29号（大年初一）个辰光，伊勒垃中国大陆电影院上映个。2025年2月10号同13号勒垃澳大利亚、新西兰等国上映，2月14号勒垃美国、加拿大首映。。

反响

票房

上映前，中国电影市场低迷，2024年中国内地电影总票房只有425.02亿元。基于近年来电影市场萧条个样子，外加伊前作个良好品质，有八家媒体对本片票房做出预测，预测票房从38亿到50亿弗等，平均值43.75亿人民币。而本片出品人王长田勒2023年个辰光接收访谈，表示“希望《哪吒2》能够带动中国电影票房进入70亿时代”。

本片上映以后，票房勒垃中国大陆春节档电影里向一骑绝尘，领先其他电影几条横马路。2月4号，上映第7天，票房突破40亿人民币，进入中国内地票房榜前十，刷新2021年《唐人街探案3》个最快达到40亿票房用时记录（用时9天9個钟头）。2月5号，上映第8天票房突破50亿人民币，刷新2021年由中国内地票房冠军《长津湖》创造个破50亿票房个用时记录（用时19天9個钟头），观影人次突破1亿。同一天，伊超越前作《哪吒之魔童降世》，成为中国内地动画电影票房冠军，《哪吒》系列成为第二隻突破100亿票房个系列电影。2月6日，上映第9天，票房超越《长津湖》个56.95亿人民币，成为中国内地电影票房顶高个电影。2月7日，上映第10天，票房到70亿人民币，超过《星球大战：原力觉醒》（2015年）成为全球单一市场票房顶高个电影。2月9号，本片观影人次超过《战狼2》（2017年），成为中国观影人次顶多个电影。2月13号，本片票房突破100亿人民币，超越《超级马力欧兄弟大电影》成為票房顶高个非迪士尼發行个动画电影、票房第三高个动画电影、全球头一部票房突破10億美元个非美國制作个电影。2月17号，票房突破120億人民币，一天里向票房超过2019年版《狮子王》、《侏罗纪世界》，全球电影票房排名升到第九，成为头一部进入全球票房总数前十个亚洲电影搭仔非好莱坞电影。後些来票房又超越《头脑特工队2》，登顶全球票房顶高个动画电影，全球电影票房排名升到第八。

海外方面，《哪吒2》勒北美地区小规模上映660家电影院，也邪气受欢迎。勒一些地方，比方讲好莱坞个中国戏院搭仔华人区，电影票一出来立时三刻就抢光。头一個双休日脚报收720万美元，排勒当周第五，大幅度超越前作《哪吒之魔童降世》369万美元个总票房成绩。到2025年2月20号，放映箇部电影个北美电影院有得945间，打破中国大陆华语电影勒垃北美发行个最大规模；同一天，本片个海外票房突破一亿人民币。

评价

外界对《哪吒之魔童闹海》个评价普遍好，认为伊延续前作个优点，勒垃剧情、特效等方面更有进步。豆瓣電影基于一百多万条评价为箇部电影打出8.5分（满分10分），超过95%个动画片搭仔98%个喜剧片。IMDb基于5000条评价为箇部电影打出8.3分（满分10分）。

红星新闻表扬伊特效、剧本、立意，标识伊“用扎实的剧本与精准的价值观表达，证明了‘尊重观众’才是真正的票房密码。”《中国日报》表示本片证明“没有人能比中国本身更好地讲述中国的神话”。《上观新闻》表扬本片延续前作个风格同节奏，勒垃战斗、特效方面进一步升级，缺点是伊滥用亲情套路，剧情缺乏悬念。《南方日报》表示箇部电影勒垃保留传统文化个精髓个同时，对传统神话故事进行大胆创新，同前作相比保留哪吒经典个反叛精神，又多仔眼普世价值。游戏科学创办人冯骥推荐箇部电影，表示伊个故事、技术侪达到全球顶尖水平，好认为伊是“国产动画片天花板”哉。而导演陶海认为，本片重视剧本创作，必过还有提升空间，表示“发狠”个人物动机同“硬拔”式个情节推动是剧作大忌。

影响

《哪吒之魔童闹海》文创作品

箇部电影上映以后爆满，一票难求，弗少网友勒垃出品人社交媒体下头评论要伊拉增加排片，满足观众个观影需求，更有地方开始卖立票，还碰着半夜场人山人海箇种少见个事体。箇当中，河南一家影院10分钟排一部本片，一天排88场，第二天更追加到99场。一些前头经营弗好、濒临倒闭箇电影院也“起死回生”，挤满看箇部电影个观众，有影院经理故咾拿哪吒当财神爷供起来，焚香祭拜。因为特效精美，弗少观众选择看多埭，中国巨幕、IMAX箇种特效厅尤其受到观众欢迎。受箇部电影出色个票房成绩影响，出品方光线传媒勒垃春节节后开股就涨停。

周边商品方面方面，《哪吒2》勒上映前就宣布同泡泡玛特、万代南梦宫、卡游等大厂合作推出盲盒、集卡、手办咾啥个商品。2月份电影上映以后，相关衍生品立时三刻卖光哉，泡泡玛特个发货日脚已经排期排到仔8月份哉，甚至同电影内容有关系个藕粉销量也同比增长三倍。到2月18号，《哪吒2》公开衍生品销售总收入已突破8亿元。

外部链接

• 《哪吒之魔童闹海》嗰新浪微博
• 《哪吒之魔童闹海》的抖音账号
• 《哪吒之魔童闹海》勒互聯網電影數據庫裡向嗰資料