吴淞
吴淞，民间亦有叫伊吴淞镇[1][2]个，勒拉上海市宝山区，大致是今朝吴淞街道附近一带。吴淞一向是上海海上个门户、对外贸易个港口[3]、兵家必争个地方，老早有“水陆要冲，苏松喉吭”、“重洋门户”、“七省锁钥”个讲法[4][5]。清末到今朝设个吴淞市、吴淞开埠工程总局、吴淞乡、吴淞商埠局、吴淞区个驻地侪勒拉迭埭[3]。吴淞东北境个吴淞口有西炮台遗址，造了只吴淞炮台湾湿地森林公园。南面有淞沪铁路吴淞站个遗址。
名字个由来
[编辑]吴淞箇片地方，本来呢叫胡巷口[3]、胡巷桥，清乾隆年间有街肆，叫胡巷桥镇[1][2]。清雍正三年(1725年)，吴淞营从宝山县城移到箇埭，所以箇埭个名字逐渐改成吴淞哉[3]。
历史
[编辑]箇埭曾经是多次打仗个地方，現在镇浪还有吴淞西炮台遗址。
清同治、光绪年间，黄浦江淤咾了快，重载商轮呒没办法进上海市区，只好勒拉吴淞口转舢板驳船，趁潮涨个辰光进进出出。英、美、法、日等国多趟要求清政府允许伊拉商人勒拉吴淞设栈起货，拿吴淞开成租界。光绪二十五年（1899年）开工造路，造仔两三年，到光绪三十一年（1905年），上海设立黄浦河道局，疏浚黄浦江，外商本来要往吴淞口转移个，现在侪回到上海市区个租界里向哉，吴淞开埠箇桩事体中止。吴淞首趟开埠结束[6]。
民国九年(1920年)11月份，江苏实业界筹备吴淞第二趟开埠。民国十年（1921年）2月份，设吴淞商埠局，由南通实业家张謇出任督办。一开始定拉个开埠区域南到闸北同租界贴壁，西到刘行、大场，北到采淘港，结果所定区域南界同沪北工部局重叠，沪北工务局提出双方划到鹅馋浦。阿末大致确定以走马塘穿江湾镇，贴拉铁道到表长河作为边界。经过三年筹备，完成全港口个测量工作。民国十三年（1924年），因商埠局经费弗足，停办[7]。
参考
[编辑]- ↑ 1.0 1.1 《吴淞区志》>>第一篇地理建置>>三、街道>>吴淞镇街道. 原始文档勒2016-03-26存档. 访问日脚2019-04-15.
- ↑ 2.0 2.1 《上海名镇志》>>江海交汇的明珠：吴淞镇. 原始文档勒2019-12-23存档. 访问日脚2019-04-15.
- ↑ 3.0 3.1 3.2 3.3 《上海地名志》>>第三篇 居民地地名>>第二章 地片、区片>>第一节 地片. 原始文档勒2016-03-27存档. 访问日脚2019-04-15.
- ↑ 《吴淞区志》>>总述. 原始文档勒2020-07-27存档. 访问日脚2019-04-15.
- ↑ 《上海名镇志》>>江海交汇的明珠：吴淞镇>>潮落潮涨的吴淞工商交通. 原始文档勒2016-03-26存档. 访问日脚2019-04-15.
- ↑ 《吴淞区志》>>第三篇 城市建设>>一、吴淞开埠>>第一次开埠. 原始文档勒2016-03-26存档. 访问日脚2019-04-15.
- ↑ 《吴淞区志》>>第三篇 城市建设>>一、吴淞开埠>>第二次开埠. 原始文档勒2016-03-26存档. 访问日脚2019-04-15.
