吴周线

吴周支线杜行火车轮渡栈桥

吴周铁路浦西部分，乃朝上粮七库专用线。

吴周线，也叫吴周支线，是老底子连接中国上海市乃朝闵行区吴泾帮浦东新区周家渡个条铁路，承担上海第三钢铁厂个运输生活，也是上海头条拿浦东帮浦西连起来个标准轨距铁路，长20.44千米，1961年造好个，勒垃吴泾通过火车轮渡过黄浦江，是上海市唯一使用过个火车轮渡。第二年，箇条线因为质量问题停用哉，只用仔半年。1965年，浦东段拆脱，浦西段後来改造成上粮七库专用线。。

历史

沿革

• 1959年9月份，线路方案确定
• 1960年1月10号，完成线路搭仔轮渡栈桥施工设计
• 1960年2月份，箇条线开工
• 1960年9月份，浦西段造好
• 1961年3月份，浦东段造好，投入运营
• 1961年9月28号，通过验收，交畀上海铁路局管理
• 1962年5月份，全线封闭停用
• 1965年，浦东段线路、轮渡栈桥附属设备开始拆脱

工程建设

大跃进运动里向，1958年到1960年，上海市各家钢铁厂产量放卫星。上海第三钢铁厂计划勒垃1960年通过铁路运输物资量有得170万吨，远期还要有300万吨。另外，浦东地区还有其他重点工厂，也要交关铁路运量，1960年毛估估要208万吨，到1967年还是1960年个2.5倍。故咾，1959年，上海市人民政府决定造吴周支线，申请国家出钞票修铁路，上海自家出钞票造火车轮渡。

1960年2月份，上海铁路局开工，有上海市家庭妇女、社会青年6,000多人参与路基土方工程。後首来，因为贯彻铁道部关于缩短基建战线个指示、支援农业、节约土地个精神，线路施工标准降级，会让站停脱，路基高度、宽度也缩水，节约土方约莫3万立方米。另外，因为轨道材料供应紧张，浦东段侪改成24千克/米个轻轨，限制行车速度是15千米/小时，严格要求机车轴重。工程总预算811.49万元，实际完成投资1573.13万元，当中铁道部出仔670.63万元，上海市出仔902.5万元。线路正线20.44千米，站线9.34千米；完成土石方21.85万立方米，造仔中小桥梁15座、涵管68座，浦西、浦东轮渡栈桥各1座，侪是单线4孔12米个上承钣梁，活动跳板长20米，设计最大上坡度为43.7‰。火车渡轮“浦江号”船体勒垃1960年8月31号完工，12月3号试航，长108.95米，型宽13米，型深5.4米，最大吃水2.9米，最大排水量2,760吨，有得股道2条，左面隻长102米，右面隻长69米，好塞进去12部重车，载重860吨，净重530吨。

建成情况

铁路造个辰光勒垃大跃进放卫星，质量推板，钢轨普遍变形、坍脱、开缝，1962年第一季度就调脱廿几根钢轨。轮渡栈桥基础个混凝土管桩也因为施工问题，多根裂开来。钢筋混凝土箱形桥有9座达弗到设计个强度要求。翁家塘桥施工个辰光中线偏移31公分，弗得弗移动线路中线。

线路拆脱

线路造好仔么，运量弗大。1962年，上海第三钢铁厂生产任务调整，产量下降，每天办理个物资只有得廿车左右，摆渡每天开两班差弗多哉。1962年5月份，全线封闭停用，原先个业务畀上海南站办理。

线路停用仔么，沿线设备损坏严重，锈脱偷脱个交关。1964年、1965年，上海铁路局两趟申请拆脱相关设施，1965年正式拆脱，一部分用来抵扣拆除钞票，一部分估价仔么转让畀当地人民公社，钞票上交畀铁道部。1966年，道砟免费送畀杜行人民公社。浦东段路基後首来改造成济阳路、浦星公路；上钢三厂厂区後首来是上海世博园区个一部分。

1965年8月份，浦西段保留，改造成上粮七库专用线。“浦江号”渡轮勒垃1969年调到杭州市，做钱塘江大桥个备战预留。