叙事疗法
叙事疗法，就是“讲故事个治疗法”。迭个物事是后现代心理治疗里向个一种花头，老早是澳大利亚心理专家M·怀特搭新西兰个D·爱普生勒1970-80年代一道弄出来个。伊拉做法交关特别，弗像老早心理医生介板要开药方，倒是欢喜帮侬一道翻翻人生故事簿，帮侬讲道理。伊拉弗大买账现在社会浪向对“毛病生活”个死板看法，觉着每個人自家个故事里向侪有自家个道理，弗好随便套模板个。
核心
[编辑]叙事疗法个核心，是外化问题——就是拿问题赶出去立壁角。比方说小青年阿明总归觉着自家“戆大”，考试弗及格、寻工作碰鼻头。医生弗会直接讲“侬弗戆”，而是问：“迭个叫'戆大'个物事，啥辰光开始蹲勒侬身浪向个？伊平常欢喜蹲勒侬左面肩胛还是右面肩胛？天热个晨光伊会得打瞌充伐？”阿明一听倒笑出来：“戆大”原来弗是自家个标签，倒是像弄堂口游来游去个野猫，高兴就来，弗高兴就好走特个。
重构故事个技巧
[编辑]- 寻例外辰光：“侬讲自家老是'触霉头'，格么去年冬至夜侬帮楼下孤老送汤团个事体算啥？迭日天'霉头'到啥地方白相去啦？”
- 见证人技术：“侬讲到小学里向偷吃过同学个粢饭糕，一直觉着自家是坏小囡。要弗要请当年个班主任王老师来讲讲，伊记得侬勒汶川地震辰光捐出来个压岁钿？”
- 重新命名：弗叫“抑郁症”，叫“心里向落黄梅雨”；弗叫“焦虑症”，叫“胸口头装了个乱跳个弹簧”；弗叫“自卑”，叫“穿错爷老头个大码套鞋”。
优势
[编辑]- 弗伤和气：弗讲侬“有病”，只讲“故事需要润润色”。
- 省钞票：弗用吃药打针，只要动动嘴皮。
- 有面子：问题都是“外头来个坏分子”，弗是自家本质推板。
特别注意
[编辑]- 弗是“编故事骗自家”，而是“发掘自家勿曾注意个闪光点”
- 要当心“捣浆糊式叙事”：弗能明明欠债弗还，硬讲自家是“现代陶渊明”
参考
[编辑]- 佩恩．叙事疗法．曾立芳，译．北京：中国轻工业出版社，2012．