上海公交DZ418路

上海公交DZ418路个配车

上海公交DZ418路，老早叫“南外滩金融直通车”，是上海市黄浦区小东门街道条定制公交线路，从中山东二路新开河路出发，望南走外马路、董家渡路，到南浦大桥公交枢纽，长约莫6公里。

历史

南外滩金融直通车

南外滩地区董家渡一面现在有交关金融企业，上班个说话要从地铁小南门站或者豫园站走至少20分钟。现在个55路、576路等路线侪沿牢中山东二路、中山南路走，外加外马路路窄，公交车站台设置起来弗便当，故咾长年呒没公交线路。2022年，经小东门街道协调，区域里向有通勤需求个太保集团、交通银行、东方证券等11家单位一淘出钞票，让久事公交开线路，叫“南外滩金融直通车”，11月28号畀箇出钞票个11家单位个职工免费试运行，2023年1月13号开始正式运营。全线有小南门地铁站、鑫景金融站（王家码头路中山南路）、金融品巷站（外马路复兴东路）、久事大厦站（中山南路东门路）四座车站，单程2公里、跑10分钟左右，早高峰从地铁站出发单向跑，晚高峰反过来。试运营两三隻号头，早高峰开始排队，线路每日天客流量约莫1200人次。2023年5月29号开始，因为客流需求大，线路配车从3部增加到4部，增设太保集团站，延伸进董家渡金融城。线路客流也增长到每日天约莫2000人次。

DZ418路

外马路个金融办公项目越来越多么，2025年8月25号，久事公交拿线路调整成DZ418线，全程6公里，双向22座车站，配车增加到9部，到年底又增加到12部。工作日早高峰（7:30-9:30）最短发车间隔3分钟、夜高峰（17:00-19:30）间隔5分钟，中浪向（11:30-13:30）发车间隔15分钟，其他辰光发车间隔20分钟。线路除开覆盖金融企业，还覆盖BFC外滩金融中心咾啥个地标商场。全线有得箇眼站头：中山东二路新开河路、十六铺/外滩浦江游船码头、十六铺三号码头（北向南）、外马路复兴东路、王家码头路外马路、王家码头路定福路、中华路王家码头路/小南门、董家渡路熙福路、董家渡路青龙桥街、外马路董家渡路、南浦大桥。当中，起点站中山东二路新开河路好接驳地铁豫园站，中华路王家码头路/小南门好换乘地铁小南门站，终点站好换乘地铁南浦大桥站。