查冷·孟汏尼

查冷·乖梅·孟汏尼 Zohran Kwame Mamdani
个人资料
出生	(1991-10-18) 1991年10月18号

查冷·乖梅·孟汏尼（英语：Zohran Kwame Mamdani，1991年10月18号生），中文也翻译成佐赫兰·夸梅·马姆达尼或者卓蘭·夸梅·曼達尼，是一個美国政客，2021年开始當纽约州议会第36选区议员，选区勒垃皇后区。渠是民主党搭美国民主社会主义者个成员，2025年纽约市市长选举当选仔市长。

孟汏尼是学者马哈茂德·孟汏尼搭导演米拉·奈尔个儿子，生勒乌干达，小辰光勒南非蹲过一段辰光。七岁个辰光，渠跟牢爷娘移民到美国，定居勒纽约市。渠从布朗克斯科学高中（Bronx High School of Science）毕业以后，勒鲍登学院（Bowdoin College）拿着非洲研究学士学位。从政之前，伊做过住房咨询师，还搞过嘻哈音乐。2020年，渠挑战连牢当仔四届个议员阿拉维拉·西莫塔斯（Aravella Simotas），成功胜选，进仔纽约州议会。之后，伊无得对手咾，轻松连任。

2024年，孟汏尼宣布参加2025年纽约市市长选举。渠个竞选主张包括：免费城市公交、公共托儿服务、市营平价超市、冻结租金管制房子个租金，还有多造眼平价社会福利房。渠批评以色列政府。 勒民主党初选个辰光，孟汏尼得着交关进步派大亨个支持，譬如勃热·商特斯搭亚历山德里娅·奥卡西奥-科尔特斯（AOC）。2025年6月24号初选结果出来哉，因为安德鲁·科莫（Andrew Cuomo）认输退选哉咾，孟汏尼变成功民主党个候选人。11月4号个大选，孟汏尼担着50.4%个选票，打败仔独立候选人科莫咾共和党候选人柯特斯·斯利瓦，当选仔市长。

早年经历搭教育

查冷·乖梅·孟汏尼1991年10月18号勒垃乌干达坎帕拉出世。渠拉爷叫马哈茂德·孟汏尼（Mahmood Mamdani），是哥伦比亚大学后殖民研究教授，渠是印度裔乌干达人，祖上是古吉拉特什叶派穆斯林。渠拉娘叫米拉·奈尔（Mira Nair），是印度裔美国电影导演，是旁遮普印度教背景。渠拉爷特为搭伊取仔個中间名“乖梅”（Kwame），是为仔纪念加纳頭一任总统乖梅·尔克鲁埋（Kwame Nkrumah）。