兰溪牛肉面

金华市区一爿面馆卖个兰溪牛肉面

兰溪牛肉面是中国浙江兰溪个一种汤面，原料是牛肉搭仔手擀面条，经过特制调味做出来个。

历史

兰溪手擀面老早是明清辰光来往兰江个商帮个“簰面”，意思是竹筏林立个江面个样子。抗战辰光，杭州奎元馆师傅勒垃兰溪避难个辰光开仔爿兰溪奎元馆，卖片儿川。1987年，当地厨师朱桂香、郑其坎夫妇拿簰面搭仔片儿川个做法拼起来，经过改良，创造出兰溪地方特色个牛肉面，勒垃兰溪开仔“青石井”“旗开”面馆，慢慢交勒垃兰溪市里向流行起来。2000年代，部分兰溪人跑到金华、东阳等地开牛肉面馆。2016年，兰溪市里向有得专业面馆299家，城区就有得230家。

2020年开始，兰溪市人民政府开始推广兰溪牛肉面，先后成立兰溪市美食协会、兰溪市美食中心，出台制作规范、培训机制，接进“兰溪日子·有戏有味”区域公共品牌标识；同时通过兰溪市美食中心，支持勒垃外地开兰溪牛肉面店。2025年，兰溪牛肉面店有得3000多家，上万人做箇门生意。同年9月份，兰溪市兰创投资集团推出预包装个兰溪牛肉面产品。

做法

根据2021年兰溪市美食协会发布个《兰溪牛肉面制作规范》，兰溪牛肉面做个辰光分成制面、备料、烹制三隻主要环节。面条拣手擀面：往面粉里向搁清水、少量食用碱，做成面团，摆段辰光，再手擀成薄片，抈起来切成细条，阿末刀切成0.25公分阔个细面。

炒个辰光，先拿浆过垃个兰溪黄牛肉丝摆进热油锅里向快速爆炒，再加西红柿丁、笋片、雪菜、水亭千张、大蒜末、大蒜叶段、青椒丁咾啥个配料翻炒出香味道，搁眼鲜汤做成浇头。同一辰光，手擀面摆进滚烫个开水里向，到八成熟么捞起来摆进炒好个牛肉汤料里向，等面条充分吸收汤汁么就好出锅端上来哉。