兰溪城隍庙

兰溪城隍庙
兰溪市文物保护单位
所在	云山街道市区庙前街
分类	古建筑
时代	清
编号	第二批，编号不详
登录	1992年12月31号

兰溪城隍庙勒垃中国浙江省金华市兰溪市云山街道金钟岭社区庙前街北端18号（老底子延安路小学里向），西面是状元第巷，东面是文襄巷，北面是金钟岭。里向有唐文襄公祠也就是唐天官祠，祭祀个是明三边总制、三部尚书唐龙。

历史

兰溪城隍庙建筑弗晓得啥年代个，顶早好上溯到北宋崇宁四年（1105年）县尉陸和中重造个。明洪武三年扩建个，後来重造多埭，包括明宣德初年、成化十六年、隆庆二年、万历年间、清嘉庆二年，有碑记。咸丰十一年（1862年），长毛占领兰溪，拿城隍庙一把火烧脱。现在个建筑是清同治二年（1863年）到光绪八年重造个，两月初两城隍爷寿辰搭仔三月十五号忠祐庙神寿辰，侪有得民间组织双庆会组织庆祝。1940年，庙里向创办中心国民学校。

建筑

兰溪城隍庙面朝西南，靠仔座山，原本有前后三进五开间，占地面积1700平方米，中轴线丄分别是头门、二门、前殿、中殿、寝殿，两面是厢房。头门勒垃县前街，也就是现在延安路，三开间。头门里向是庙前街，东面有打铁巷，西面有世德路、世德坊，顶头是默相坊，东面有文襄坊、文襄巷。二门，五开间，门外青石抱鼓，门里向是前殿，五开间楼房，有戏台。中殿前有“护国佑民”牌坊搭仔香炉。头门、前殿1980年代辰光拆脱改造教学楼。

兰溪城隍庙现在还留有中殿、后殿，雕刻精美，搭仔两殿当中个厢房。

保护

1992年12月31号，第二批兰溪市文物保护单位公布，兰溪城隍庙勒垃里向，编号呒晓得。

2023年12月5号，兰溪城隍庙历史文化街区成为第七批浙江省历史文化街区。