光新路

光新路来勒中華人民共和國上海市普陀區東部，南起光复西路蘇州河，北到交通路京沪铁路接志丹路，长1.02公里，宽35米到40米，沥青混凝土路面。箇条路虬江（乃朝真如港）以南路段来勒中华民国大陸時期叫朱家湾街（朱家湾大街），是宽3米个弹街路，是朱家湾镇个集市街坊。1952年拓宽，向北延伸到交通路，因为从光复西路通往甘泉新村，故咾1953年改名叫光新路。1980年拓寬；1983年，中山北路到交通路段加固改建，车行道拓宽。1984年来勒沪杭铁路道口东面造了条人行地道；1986年又拓宽沪宁铁路道口，造了横跨沪宁铁路个光新路交通路人行立交桥。

1989年6月6号、7号，六四事件期間有人利用161次列车开进上海沪杭铁路光新路铁路道口个辰光发生个交通事故，放火拿火车搭警用摩托车烧脱。近600名武警、铁路警察外加9部消防车到现场抢救。事故造成6人死脱，6人受伤，11人當場畀捉牢。6月15号，放火个人畀判死刑。

1991年後，光新路沪宁鐵路、沪杭铁路道口人行立交桥外加光新路沪杭铁路道口人行地道拆脱。1994年，为咾解决铁路道口每天一拢总关脱8個钟头，影响过往交通个问题，新造穿铁路外加交通路个光新路铁路立交桥搭地道，立交橋通機動車，非機動車帮行人走地道。同年12月份再拓宽。

沿路設施

光新路沿路有沪西工人文化宫体育中心，本名普陀区工人体育场，1956年3月份，由上海市工会联合会（上海市总工会）投资造个，1957年6月份开放。占地面积约2.2公顷。有400米标准田径场地，标准足球场，1座容纳1500名观众个混凝土单层看台。1971年6月23号，普陀区公检法军管组来勒体育场召开公判大会，挤死7人，伤99人。后些来畀普陀区体育运动委员会管理，改名叫普陀体育场。