俞萬春

俞萬春（1794年—1849年），字仲華，清朝小說家，號「忽來道人」，吳越浙江山陰（箇卯个紹興）人。俞萬春早年跟牢阿爹從軍，平定民變。後來受伽阿爹囑託，用廿二年寫勒部長篇小說《蕩寇志》（也叫《結水滸傳》）。本書來夯咸豐三年（西曆1853年）刊行於世。俞萬春還寫過《騎射論》、《釋醫學辯證》、《淨土事相》咾介。

生平

清朝乾隆五十九年（1794年），俞萬春生勒浙江山陰一個地方官吏屋裏，渠小辰光姆媽無有哋，身體虛，只管生毛病。伽屋裏書有木牢牢，俞萬春從小蠻聰明，讀勒蠻多个書，也歡喜弓馬、兵法，還有醫學。廿歲个辰光，渠跟牢伽阿爹到廣東從軍，平定道光十一年（1831年）到十二年粵東瑤民个民變。民變平定之後以功敘官，俞萬春堅辭弗就，後來回到浙江，蹲夯杭州西湖，行醫濟世。道光廿年（1840年），英軍攻打順德，俞萬春貤獻策軍門，備陳戰守器械，得着箇辰光浙江巡撫劉玉坡个讚賞。俞萬春性情倜儻，淡泊功名，專門擔酒一壺，鐵笛一枝，掛夯牛角丄，來夯西湖邊丄趤趤，自號「黃牛道人」。

渠晚年个辰光皈依佛教，道光廿九年（1849年）元旦也無有生毛病就走壞哋，走壞之前頌勒一百遍《金剛經》。

《蕩寇志》

俞萬春是道光六年（1826年）開始寫《蕩寇志》个。根據伽阿弟俞灥个回憶，俞萬春覺着羅貫中个《水滸傳》裏向「邪說淫辭，壞人心術，貽害無窮」，渠告送伽阿爹之後，受着父親个囑託寫一部《水滸傳》个續書，「提明真事，破他偽言，使天下後世深明盜賊、忠義之辨」。俞萬春來夯《蕩寇志緣起》裏向自話是十三歲个辰光受着「雷霆上將陳麗卿」託夢咾寫箇本書。但是根據伽阿弟俞灥个話法，是因爲俞萬春小辰光毛病多，受過一個叫陳麗卿个女道士个醫治，介咾有箇个講法。《蕩寇志》个初稿是道光十五年（1835年）完成个，之後作者則渠大幅刪改過，到道光廿七年（1847年）再寫好，但是無有出版。根據伽兒子个記載，俞萬春死壞个辰光，《蕩寇志》還無有修改好，着末來是伽兒子來夯道光三十一年（1851年）校訂刊印个。本書接牢《水滸傳》第七十回「忠義堂石碣受天文 梁山泊英雄驚惡夢」个故事，從第七十一回寫到第一百四十回，一共七十回，交來附「結子」一回。